Россия Ташқи ишлар вазирлиги 16 апрель куни Буюк Британиянинг Москвадаги элчиси Дебора Броннертни вазирлик идорасига чақирди. Бу ҳақда Meduza хабар берди.
Бир кун олдин Буюк Британия Ташқи ишлар вазирлиги ҳам Россия элчиси Андрей Келинни «Россиянинг зарарли хатти-ҳаракатлари» муносабати билан чақирган эди.
«Британия ҳукумати Россия давлатининг зарарли хатти-ҳаракатларидан қаттиқ хавотирда. Бугунги учрашувда давлат котиби ўринбосари сэр Филип Бартон Буюк Британиянинг АҚШ президенти Жо Байден эълон қилган санкцияларини қўллаб-қувватлашини маълум қилади», — дейилган эди Буюк Британия баёнотида.
Бартоннинг таъкидлашича, Буюк Британия АҚШнинг «Россия SolarWinds дастури орқали Америка ҳукумати идораларига уюштирилган киберҳужумга алоқадор» деган фикрига қўшилади. Шунингдек, Бартон Россия қўшинлари Украина чегараси яқинида ва Қримда тўпланишидан хавотир билдирди.
15 апрель куни АҚШ Россияга қарши янги санкциялар жорий қилди. Янги санкциялар Россиянинг АҚШдаги 2020 йилги президентлик сайловларига аралашиши, АҚШ ҳукумат идораларига қилинган киберҳужум ва Россиянинг Афғонистондаги америкаликларга қарши «Толибон» жангарилари билан тил бириктиргани билан боғлиқ. Оқ уй февраль ойида Россиянинг ушбу ҳаракатлари учун АҚШ расмийлари унга қарши санкциялар режалаштираётганини айтганди.
Польша АҚШнинг Россияга қарши санкцияларини қўллаб-қувватлади. Польша Варшавадаги уч нафар россиялик дипломатни persona non grata деб эълон қилди, улар мамлакатдан чиқариб юборилади. Биргаликда қабул қилинган, келишилган иттифоқ қарорлари Россиянинг душманлик ҳаракатларига энг муносиб жавобдир», — дейилади Польша хабарида.
Ўз навбатида НАТО ҳам АҚШнинг Россияга қарши янги санкцияларни мамнуният билан қўллаб-қувватламоқда. НАТО Россияни Евро-Атлантика хавфсизлигига таҳдид деб билмоқда ва Москвани «беқарорлаштирувчи хатти-ҳаракатларни дарҳол тугатишга ва иттифоқчилар сингари ўз мажбуриятларини, хусусан, қурол назорати, қуролсизлантириш ва қуролни тарқатмаслик шартларини бажаришга чақирди».
«РБК» хабарига кўра, Оқ уй вакили Жен Псаки АҚШ президенти Жо Байденнинг россиялик ҳамкасби Владимир Путин билан учрашув ўтказиш тўғрисидаги таклифи АҚШ ҳукумати Россияга қарши янги санкцияларни жорий этганига қарамай амалда қолганини маълум қилган.
13 апрель куни Путин ва Байден ўртасида телефон орқали суҳбат бўлиб ўтган эди, унда АҚШ президенти Путин билан шахсан учрашишни ҳамда Москва ва Вашингтон ўртасидаги муносабатларни муҳокама қилишни таклиф қилди. Кейинчалик Псаки Путин ва Байден ўртасидаги учрашув яқин ойларда бўлиб ўтиши мумкинлигини маълум қилди.
Изоҳ (0)