Шавкат Мирзиёев 15 апрель куни Самарқанд шаҳрига келгани ҳақида хабар берилган эди. Давлат раҳбари шаҳарнинг Қорасув мавзесида қурилган кўп қаватли уйларни бориб кўрди.
Президент матбуот хизматининг маълум қилишича, Шавкат Мирзиёев 2019 йилда вилоятга ташрифи чоғида бу ердаги дастлабки уйларни кўздан кечириб, янги лойиҳалар тақдимоти билан танишган эди. Ўтган даврда бу лойиҳалар амалга оширилди. Агромир Buildingс масъулияти чекланган жамияти томонидан мавзеда 16, 15, 14 ва 12 қаватли жами 47 та турар жой қурилди. Уларда 3 минг 588 та хонадон бор.
Турар жойларнинг фасади 3 қаватли қопламадан иборат бўлиб, хонадонлар қишда иссиқ, ёзда салқин бўлишини таъминлайди. Биноларга видеокузатув тизими, юқори технологияли ёнғин хавфсизлиги ускуналари ўрнатилган. Ҳар бир хонадон алоҳида иситиш қозони билан жиҳозланган. Уйлар эгаларига тайёр ҳолда топширилмоқда.
Қорасув мавзесида қурилган кўп қаватли уйлар сони 116 тага етди. Шунингдек, бу ерда 1 минг 600 ўринли мактаб, 120 ўринли болалар боғчаси, маҳалла фуқаролар йиғини биноси, савдо дўконлари, ўйин ва спорт майдончалари барпо этилган. 2021 йилда яна 7 та 16 қаватли, 2 та 25 қаватли уйлар қурилмоқда.
Давлат раҳбари уй-жойлар ва инфратузилма тармоқларининг сифатига алоҳида эътибор қаратган. Қурувчи ташкилотнинг сифат учун масъулияти ва жавобгарлигини янада кучайтирадиган механизм ишлаб чиқиш зарурлигини таъкидлаган.
«Ривожланган давлатлардагидек уйлар қуришни ўзлаштирдик, энди хизмат кўрсатишни ҳам шунга яраша яхшилаш керак», — деган Шавкат Мирзиёев.
Президент чет эл тажрибаси асосида сервис турларини кенгайтириш, кўп қаватли уйларга хизмат кўрсатувчи корхона ҳамда ёнғин хавфсизлигини таъминлаш бўйича махсус пункт ташкил этиш юзасидан тавсиялар берган.
Шу ерда Самарқанд шаҳри бош режаси ва шаҳар ҳудудини кенгайтириш лойиҳалари тақдимоти ўтказилган.
Бунда аввал Шавкат Мирзиёев Самарқанд халқаро аэропортидаги қурилиш ишларини, Имом Бухорий ёдгорлик мажмуасини кенгайтириш бўйича амалга оширилаётган ишларни кўздан кечиргани ҳақида хабар берилган эди.
Изоҳ (0)