Hukumatning 10-apreldagi “Suv resurslaridan oqilona foydalanish va suv xo‘jaligi obyektlaridan foydalanish borasida davlat-xususiy sheriklikni kengaytirish chora-tadbirlari to‘g‘risida”gi qarori qabul qilindi, deb xabar bermoqda “Gazeta.uz”. Hujjat bilan Qoraqalpog‘iston Respublikasi va viloyatlarda 2021-yilning mart—sentabr oylarida qishloq xo‘jaligi ekinlarini sug‘orish ishlari uchun suv olish limitlari tasdiqlandi.
Unga ko‘ra, respublika bo‘yicha jami limit 29 milliard 236 million 500 ming kub etib o‘rnatilmoqda:
- Qoraqalpog‘iston — 4 milliard 92 million kub;
- Andijon viloyati — 1 milliard 757 million 900 ming kub;
- Buxoro viloyati — 2 milliard 326 million kub;
- Jizzax viloyati — 1 milliard 817 million 500 ming kub;
- Qashqadaryo viloyati — 3 milliard 93 million kub;
- Navoiy viloyati — 899 million kub;
- Namangan viloyati — 1 milliard 672 million 800 ming kub;
- Samarqanl viloyati — 2 milliard 279 million 400 ming kub;
- Surxondaryo viloyati — 2 milliard 410 million 900 ming kub;
- Sirdaryo viloyati — 1 milliard 648 million kub;
- Toshkent viloyati — 2 milliard 399 million 600 ming kub;
- Farg‘ona viloyati — 2 milliard 115 million kub;
- Xorazm viloyati — 2 milliard 725 million 300 ming kub.
20-aprelga qadar yozgi sug‘orish mavsumida suvdan foydalanish va suv iste’molchilari bo‘yicha tegishli shartnomalar to‘liq rasmiylashtiriladi.
Shuningdek, 2021-yilda jami 100 ta irrigatsiya va melioratsiya obyekti davlat-xususiy sheriklik asosida modernizatsiya qilinadi hamda boshqaruvga beriladi.
Qarorga muvofiq, suv tanqisligining oldini olish maqsadida amalga oshirilishi lozim bo‘lgan tadbirlarning prognoz ko‘rsatkichlari tasdiqlandi.
Avvalroq Prezident Shavkat Mirziyoyev Toshkent viloyatiga tashrifi chog‘ida hududdagi ekin yerlarini sug‘orish uchun Chorvoq suv omboridan suv ta’minoti cheklanishini ta’kidlagan edi. “Sizlarga faqat Chorvoqni ochib bersa. Kanal suvga to‘lsa, keyin 24 soat suv oqadi. Siz hattoki ikki soat ham suvni nazorat qilmaysiz”, — degan edi Prezident hokimlarga yuzlanib.
2020-yilning 10-iyulida esa Prezidentning “O‘zbekiston Respublikasi suv xo‘jaligini rivojlantirishning 2020—2030-yillarga mo‘ljallangan konsepsiyasini tasdiqlash to‘g‘risida”gi farmoni imzolangan edi.
Izoh (0)