Sirdaryoda qashqadaryolik haydovchi boshqaruvidagi Nexia’dan iste’molga yaroqsiz 329 kg go‘sht aniqlandi

Sirdaryoda YPX postida Qashqadaryo viloyati Koson tumanida yashovchi J.S. boshqaruvidagi Nexia rusumli avtotransport vositasi tekshirilganda hech qanday hujjatlarsiz olib ketilayotgan 329 kilogramm qoramol go‘shti borligi aniqlandi, deb xabar beradi viloyat IIB axborot xizmati.

Ushbu go‘sht mahsulotlari viloyat “Hayvonlar kasalliklari tashxisi va oziq-ovqat mahsulotlari xavfsizligi davlat markazi”ga olib kelinib, laboratoriya tekshiruvlaridan o‘tkazilganda iste’molga yaroqsiz ekanligi ma’lum bo‘lgan.

Go‘sht mahsulotlari viloyat Veterinariya va chorvachilikni rivojlantirish boshqarmasining tegishli xulosasiga asosan Guliston tumani “Zarbdor” mahallasi hududida yoqish yo‘li bilan yo‘q qilingan.

Fuqaro J.S. boshqaruvidagi Nexia rusumli avtotransport vositasi tegishli tartibda qonuniy chora ko‘rish uchun Bosh prokuratura huzuridagi Iqtisodiy jinoyatlarga qarshi kurashish departamentining Sirdaryo viloyati boshqarmasi mas’ul xodimlariga tegishli tartibda topshirilgan.

Avvalroq Qashqadaryoda uyida eshak so‘yib sotayotgan shaxslar ushlangani, Qashqadaryoda iste’molga yaroqsiz 800 kilogramm go‘shtni mashina saloni va yukxonasida olib ketayotgan shaxslar aniqlangani to‘g‘risida xabar berilgandi.