Ҳукуматнинг 10 апрелдаги «Сув ресурсларидан оқилона фойдаланиш ва сув хўжалиги объектларидан фойдаланиш борасида давлат-хусусий шерикликни кенгайтириш чора-тадбирлари тўғрисида»ги қарори қабул қилинди, деб хабар бермоқда «Gazeta.uz». Ҳужжат билан Қорақалпоғистон Республикаси ва вилоятларда 2021 йилнинг март—сентябрь ойларида қишлоқ хўжалиги экинларини суғориш ишлари учун сув олиш лимитлари тасдиқланди.
Унга кўра, республика бўйича жами лимит 29 миллиард 236 миллион 500 минг куб этиб ўрнатилмоқда:
- Қорақалпоғистон — 4 миллиард 92 миллион куб;
- Андижон вилояти — 1 миллиард 757 миллион 900 минг куб;
- Бухоро вилояти — 2 миллиард 326 миллион куб;
- Жиззах вилояти — 1 миллиард 817 миллион 500 минг куб;
- Қашқадарё вилояти — 3 миллиард 93 миллион куб;
- Навоий вилояти — 899 миллион куб;
- Наманган вилояти — 1 миллиард 672 миллион 800 минг куб;
- Самарқанл вилояти — 2 миллиард 279 миллион 400 минг куб;
- Сурхондарё вилояти — 2 миллиард 410 миллион 900 минг куб;
- Сирдарё вилояти — 1 миллиард 648 миллион куб;
- Тошкент вилояти — 2 миллиард 399 миллион 600 минг куб;
- Фарғона вилояти — 2 миллиард 115 миллион куб;
- Хоразм вилояти — 2 миллиард 725 миллион 300 минг куб.
20 апрелга қадар ёзги суғориш мавсумида сувдан фойдаланиш ва сув истеъмолчилари бўйича тегишли шартномалар тўлиқ расмийлаштирилади.
Шунингдек, 2021 йилда жами 100 та ирригация ва мелиорация объекти давлат-хусусий шериклик асосида модернизация қилинади ҳамда бошқарувга берилади.
Қарорга мувофиқ, сув танқислигининг олдини олиш мақсадида амалга оширилиши лозим бўлган тадбирларнинг прогноз кўрсаткичлари тасдиқланди.
Аввалроқ Президент Шавкат Мирзиёев Тошкент вилоятига ташрифи чоғида ҳудуддаги экин ерларини суғориш учун Чорвоқ сув омборидан сув таъминоти чекланишини таъкидлаган эди. «Сизларга фақат Чорвоқни очиб берса. Канал сувга тўлса, кейин 24 соат сув оқади. Сиз ҳаттоки икки соат ҳам сувни назорат қилмайсиз», — деган эди Президент ҳокимларга юзланиб.
2020 йилнинг 10 июлида эса Президентнинг «Ўзбекистон Республикаси сув хўжалигини ривожлантиришнинг 2020—2030 йилларга мўлжалланган концепциясини тасдиқлаш тўғрисида»ги фармони имзоланган эди.
Изоҳ (0)