O‘zbekiston hukumatining 8-apreldagi qarori bilan Sog‘liqni saqlash vazirligi huzurida onkogematologik va davolash qiyin bo‘lgan kasalliklarga chalingan bemorlarni sog‘lomlashtirishga ko‘maklashish jamg‘armasi tashkil etilmoqda. Norma’ning xabar berishicha, bu haqda tegishli nizom tasdiqlandi.
Nizomga muvofiq, jamg‘arma mablag‘lari davlat budjetiga tushadigan tamaki mahsulotlariga qo‘yilgan aksiz solig‘i summasining 7 foizidan va jamg‘armaning vaqtincha bo‘sh turgan mablag‘larini banklarga omonat sifatida joylashtirish hamda aholi va kompaniyalar tomonidan xayriya qilingan mablag‘lar va qonunchilikda taqiqlanmagan boshqa mablag‘lar hisobiga shakllantiriladi.
Ushbu mablag‘lar quyidagilarga yo‘naltiriladi:
- bemorlarga tibbiy yordam ko‘rsatish uchun asbob-uskunalar, dori vositalari, tibbiy buyumlar, laboratoriya reaktivlari va boshqa sarflash vositalarini sotib olishga;
- kasalliklar bo‘yicha yuqori texnologiyali murakkab operatsiyalarni amalga oshirish uchun yuqori malakali xorijiy mutaxassislarni respublikaga jalb qilishga;
- bemorlarga respublikadagi davlat va nodavlat tibbiyot tashkilotlarining yuqori texnologik tashxis qo‘yish va tibbiy yordam ko‘rsatish xizmatlarini xarid qilishga.
Hujjatda belgilanishicha, “O‘zmedimpeks” DUK Sog‘liqni saqlash vazirligining davlat xaridlari bo‘yicha xaridlar komissiyasining ishchi organi, xaridlar bo‘yicha shartnomalarni imzolash uchun kontragent hamda shartnomalarga muvofiq yetkazib beriladigan tovarlarni qabul qilish, saqlash, qayta ishlash va yetkazib berish bo‘yicha agent hisoblanadi.
“Gazeta.uz”ning yozishicha, jamg‘arma kengashiga “Ezgu Amal” xayriya jamoat fondi vakillari — Aziza Umarova va Munira Xo‘jaxonova ham kirdi. Fevral oyida “Ezgu Amal” fondi Prezidentdan tibbiyotning bolalar onkologiyasi va gematologiya yo‘nalishini rivojlantirish bo‘yicha choralar ko‘rishni so‘rab murojaat qilgan edi. Keyinchalik Respublika ixtisoslashtirilgan pediatriya ilmiy-amaliy tibbiyot markazi fond ma’lumotlarini “ishonchsiz” deb atadi va xavfli o‘simtalar haqida ma’lumot berdi.
Eslatib o‘tamiz, 2020-yil dekabrida Respublika ixtisoslashtirilgan onkologiya va radiologiya ilmiy-amaliy tibbiyot markazida Sog‘liqni saqlash vazirligining ko‘magida “Ishonch” xayriya jamoat fondi tashkil etilgandi.
Izoh (0)