Koronavirusga qarshi kurashish shtabi a’zosi Sevara Ubaydullayeva fuqarolar ro‘zador bo‘lgan holatda emlanishi mumkinmi, degan savolga javob berdi, deya xabar qilmoqda Sog‘liqni saqlash vazirligi matbuot xizmati.
— Ro‘zador odamda qisman jismoniy toliqish bo‘ladi. Shunday holatda ham vaksina qabul qilish kerakmi?
— Ro‘za tutishda belgilangan talab va amallarni o‘rganib chiqsak, imkon qadar bemor odamlar o‘z salomatliklarini og‘irlashtirmasliklari uchun ayrim kasalliklarda ro‘za tutmasliklari tavsiya etiladi.
Bunday holatlarda emlash jarayoniga taklif etilgan bo‘lsangiz va shifokor ko‘rigida kasallikning o‘tkir holati yoki avj olgan davri kechayotgani ayon bo‘lsa, bu fuqarolar emlanmaydilar.
Salomatlik ko‘rsatkichlari me’yorida bo‘lib, o‘zini sog‘lom deb his qilgan fuqaro ro‘zador bo‘lib, emlashga taklif etilgan bo‘lsalar, shifokor ularning holatlarini o‘rganib chiqib, xulosa qiladi.
Bunda fuqaro salomatligi sog‘lom deb baholanib, emlash tavsiya etilgan bo‘lsa, unda emlashdan keyingi davrda shifokor bilan bog‘lanib turishlari kerak. Sababi – turli insonlar organizmining vaksinaga reaksiyasi turli xil bo‘ladi. Shu bois emlanganlar shifokor tavsiyalarini bajarishlari talab etiladi.
Ta’kidlash kerakki, insonlar ro‘zalarini buzmay turib ham, emlanish orqali organizmda koronavirus infeksiyasiga qarshi immunitet hosil qilishlari mumkin, – deydi Sevara Ubaydullayeva.
Ma’lumot uchun, O‘zbekiston musulmonlari idorasi Fatvo hay’ati dunyo ulamolari xulosasiga asoslanib, koronavirusga qarshi emlash teri osti va mushakka qilinadigan ukollardan biri bo‘lganligi, buning ustiga, oziqlantiruvchi emasligini inobatga olgan holda vaksina olish joiz ekani, bu ish ro‘zani buzmasligi bo‘yicha bayonot bergan edi.
Eslatib o‘tamiz, aholini koronavirusga qarshi emlash tadbirlari 1-apreldan boshlandi. Emlash dastlab qariyalar, sog‘liqni saqlash xodimlari, OAV vakillarida ko‘ngilli tarzda o‘tkaziladi. 9-aprel holatiga ko‘ra, mamlakat bo‘ylab 18 224 kishi koronavirusga qarshi emlangan edi.
Ular AstraZeneca va O‘zbekiston—Xitoy hamkorligida ishlab chiqilgan ZF-UZ-VAC 2001 vaksinasi bilan emlanmoqda. Bunda emlanuvchi birinchi emlanishni qaysi vaksina bilan boshlasa, ikkinchisini ham aynan o‘sha vaksina bilan yakunlaydi.
Izoh (0)