Ўзбекистон ҳукуматининг 8 апрелдаги қарори билан Соғлиқни сақлаш вазирлиги ҳузурида онкогематологик ва даволаш қийин бўлган касалликларга чалинган беморларни соғломлаштиришга кўмаклашиш жамғармаси ташкил этилмоқда. Norma’нинг хабар беришича, бу ҳақда тегишли низом тасдиқланди.
Низомга мувофиқ, жамғарма маблағлари давлат бюджетига тушадиган тамаки маҳсулотларига қўйилган акциз солиғи суммасининг 7 фоизидан ва жамғарманинг вақтинча бўш турган маблағларини банкларга омонат сифатида жойлаштириш ҳамда аҳоли ва компаниялар томонидан хайрия қилинган маблағлар ва қонунчиликда тақиқланмаган бошқа маблағлар ҳисобига шакллантирилади.
Ушбу маблағлар қуйидагиларга йўналтирилади:
- беморларга тиббий ёрдам кўрсатиш учун асбоб-ускуналар, дори воситалари, тиббий буюмлар, лаборатория реактивлари ва бошқа сарфлаш воситаларини сотиб олишга;
- касалликлар бўйича юқори технологияли мураккаб операцияларни амалга ошириш учун юқори малакали хорижий мутахассисларни республикага жалб қилишга;
- беморларга республикадаги давлат ва нодавлат тиббиёт ташкилотларининг юқори технологик ташхис қўйиш ва тиббий ёрдам кўрсатиш хизматларини харид қилишга.
Ҳужжатда белгиланишича, «Ўзмедимпекс» ДУК Соғлиқни сақлаш вазирлигининг давлат харидлари бўйича харидлар комиссиясининг ишчи органи, харидлар бўйича шартномаларни имзолаш учун контрагент ҳамда шартномаларга мувофиқ етказиб бериладиган товарларни қабул қилиш, сақлаш, қайта ишлаш ва етказиб бериш бўйича агент ҳисобланади.
«Gazeta.uz»нинг ёзишича, жамғарма кенгашига «Эзгу Амал» хайрия жамоат фонди вакиллари — Азиза Умарова ва Мунира Хўжахонова ҳам кирди. Февраль ойида «Эзгу Амал» фонди Президентдан тиббиётнинг болалар онкологияси ва гематология йўналишини ривожлантириш бўйича чоралар кўришни сўраб мурожаат қилган эди. Кейинчалик Республика ихтисослаштирилган педиатрия илмий-амалий тиббиёт маркази фонд маълумотларини «ишончсиз» деб атади ва хавфли ўсимталар ҳақида маълумот берди.
Эслатиб ўтамиз, 2020 йил декабрида Республика ихтисослаштирилган онкология ва радиология илмий-амалий тиббиёт марказида Соғлиқни сақлаш вазирлигининг кўмагида «Ишонч» хайрия жамоат фонди ташкил этилганди.
Изоҳ (0)