Марказий сайлов комиссиясининг 14 апрель куни ўтказилган мажлисида Ўзбекистон Президенти сайловига тайёргарлик кўриш бўйича асосий тадбирлар дастури тасдиқланди. Бу ҳақда МСК матбуот хизмати маълум қилди.
«Дастурдан ҳамкор ташкилотлар билан биргаликда илк бор Сайлов кодекси асосида ўтажак Президент сайловига тайёргарлик кўриш борасида қадам-бақадам амалга ошириладиган ишлар ўзининг батафсил ифодасини топган. Бажариладиган вазифаларнинг ижро муддати ва масъул ижрочилари аниқ кўрсатилган», — дейилади МСК хабарида.
Асосий тадбирлар дастурида сайлов жараёнига замонавий ахборот-коммуникация технологияларини жорий қилиш, ушбу жараёнда ахборот-тушунтириш ишларини ташкил этиш, сайловга тайёргарлик жараёнини коронавирус пандемияси шароитини ҳисобга олган ҳолда ўтказиш бўйича аниқ вазифалар ҳам белгиланган.
Дастурга мувофиқ, сайловга тайёргарлик кўриш жараёнини ҳуқуқий ва услубий жиҳатдан таъминлаш мақсадида барча округ ва участка сайлов комиссияларининг аъзолари учун семинарлар, тренинглар, ўқув машғулотлари, конференциялар, давра суҳбатлари бошқа тадбирлар, жумладан он-лайн мулоқотлар, ўтказилади.
МСК мажлисида, шунингдек, президентлик сайловини ўтказувчи округ ва участка сайлов комиссияларининг фаолияти тартибини белгилаб берувчи ҳамда Ўзбекистон Президентлигига номзодларнинг сайловолди ташвиқотини олиб бориш тартибига доир низомлар қабул қилинган.
Эслатиб ўтамиз, Ўзбекистонда Президент сайловлари декабрь ойидан октябрга кўчирилган. Сайлов муддатлари кўчирилиши юзасидан Олий Мажлис Қонунчилик палатаси изоҳ берганди.
Шавкат Мирзиёев 2020 йил 29 декабрь куни Олий Мажлисга йўллаган Мурожаатномасида 2021 йилда ўтказиладиган «давлат ва халқ ҳаётидаги муҳим сиёсий ҳодиса» — президентлик сайловлари масаласига тўхталиб ўтганди. Ўшанда Президент Марказий сайлов комиссияси «бўлажак сайловларнинг миллий қонунчилик ва умумеътироф этилган халқаро демократик тамойиллар асосида юксак савияда ташкил этилишига алоҳида эътибор қаратиши» лозимлигини таъкидлаган.
«Gazeta.uz»нинг қайд этишича, Марказий сайлов комиссияси 2021 йилда давлат бюджетидан «жорий харажатлар учун» 2020 йилга нисбатан 74 баравар кўп — 4,1 миллиардга нисбатан 304,2 миллиард сўм маблағ ажратди.
Изоҳ (0)