Ўзбекистонда Red Bull сақичини ишлаб чиқарувчилар 2,4 миллион сўм жаримага тортилди. Бу ҳақда Интеллектуал мулк агентлиги матбуот хизмати хабар берди.
Маълум бўлишича, «М.Р.Р.» (шартли ном) оилавий корхона Red Bull GmbH (Австрия) компаниясига тегишли бўлган товар белгисидан ноқонуний фойдаланиб, Red Bull Energy Cаndy товар белгили қандолат маҳсулотларини ишлаб чиқариш ва сотиш билан шуғулланиб келган.
Red Bull GmbH компанияси товар белгисига бўлган ҳуқуқлари бузишини тўхтатишни сўраб 2020 йилнинг 10 мартидан «М.Р.Р.» оилавий корхонаси раҳбарига бир неча огоҳлантирув хати юборган, аммо корхона мурожаатни эътиборсиз қолдирган.`
Шундан сўнг Австрия компанияси товар белгисидан ноқонуний фойдаланганлик учун чора кўриш юзасидан Интеллектуал мулк агентлигига мурожаат қилган. Агентлик вазиятни ўрганиб чиқиб, ҳуқуқбузарга маъмурий жавобгарлик масаласини кўриб чиқишлик учун баённома тузилиб, жиноят судига юборган.
Суд товар белгисидан ноқонуний фойдаланган «М.Р.Р.» оилавий корхонасига базавий ҳисоблаш миқдорининг 10 баравари (тахминан 2,4 миллион сўм) миқдорида жарима жазоси белгилаган.
Маълумот учун, Австриянинг Red Bull GmbH компанияси Ўзбекистонда ўзининг маҳсулотларида қўлланиладиган товар белгиларини Интеллектуал мулк агентлигидан рўйхатдан ўтказиб, ҳуқуқий муҳофаза олган.
Изоҳ (0)