2-avgust kuni Tokioda Yamato Xata va Sigetosi Kotari o‘rtasida ikkinchi yarim yengil vazn toifasida OPBF (Oriental and Pacific Boxing Federation) jahon chempionligi uchun kechgan professional boks oqshomi bo‘lib o‘tdi. Tadbir Teiken Promotions promouterlik kompaniyasi tomonidan tashkil etildi.
Jang durang bilan yakunlandi — nokautchi Xata g‘alaba qozona olmadi, ammo chempionlikni o‘zida saqlab qoldi. 12 raund yakunlangach, Kotari o‘zini yomon his qilgan va ring burchagida hushidan ketgan. U darhol kasalxonaga yetkazildi, u yerda subdural gematoma tashxisi qo‘yildi. Bokschi zudlik bilan operatsiya qilindi, biroq bir necha kundan so‘ng 28 yoshli sportchi vafot etdi. Bu haqda WBO xabar berdi: “Boks olami 2-avgust kuni bo‘lib o‘tgan chempionlik jangida olgan jarohatlari tufayli vafot etgan yaponiyalik bokschi Sigetosi Kotari vafoti munosabati bilan motam tutmoqda. Ring jangchisi. Oramizni juda erta tark etdi. Uning oilasiga hamdardlik bildiramiz”.
Odamlar bu qayg‘uli xabarni hazm qilishga ulgurmasdan, orqasidan yana bir noxush xabar keldi. Xuddi shu kardda Xiromasa Urakava ham jang qilgandi. Uning raqibi Yodzi Sayto bo‘ldi. Saytoning bir nechta nokdaunlaridan so‘ng, jang sakkizinchi raundda to‘xtatildi. Bundan tashqari, Urakava o‘sha jangda hakamlar hisob-kitobiga ko‘ra oldinda borayotgandi. Jangdan so‘ng Xiromasa ham shoshilinch ravishda kasalxonaga yotqizilgan va unga subdural gematoma tashxisi qo‘yilgan. Bokschi operatsiya qilindi (kraniotomiya), ammo vafot etdi.
Shundan so‘ng, WBC rahbari Maurisio Sulaymon so‘zga chiqdi: “Boks olami Yaponiyada bir kardda jang qilgan ikki bokschining fojiali o‘limi munosabati bilan hayratda va chuqur qayg‘uda. Ularning xotirasi obod bo‘lsin”.
Bu hali hammasi emas. Ba’zi manbalar, jumladan The Ring nashrining yozishicha, kechaning markaziy jangida Kotari bilan durang qayd etgan Yamato Xata ham olgan jarohatlari tufayli kasalxonaga yotqizilgan va hozirda koma holatida. Butun boks olami uchun mutlaqo qora kun.
Subdural gematoma nima? Bunda qon miyaning qattiq va to‘rsimon pardalari orasida to‘planadi va buning hisobiga miya ichi bosimi oshadi va shikastlanishi mumkin. Masalan, bir paytlar rossiyalik bokschi Magomed Abdusalomov ham shunday jarohat olgan edi. Va umuman olganda, bu, afsuski, boks uchun nisbatan keng tarqalgan jarohat. Shifokorlarning ta’kidlashicha, professional sportchilar duch keladigan ekstremal vazn poygalari bunday qon ketish xavfini sezilarli darajada oshiradi, chunki likvor (miya va orqa miyani o‘rab turgan va ularni mexanik ta’sirlardan himoya qiladigan suyuqlik) hajmi kamayadi va miya ancha zaif bo‘lib qoladi.
2-avgust kuni sodir bo‘lgan voqeadan so‘ng Yaponiya boks komissiyasi OPBF chempionlik janglari 12 raund emas, balki 10 raund davom etishini e’lon qildi. Bundan tashqari, bokschilarga ko‘proq xavfsizlikni ta’minlash maqsadida vazn o‘lchash va gidratatsiya qoidalari qayta ko‘rib chiqiladi.
Albatta, bu yo‘nalishda faqat Yaponiya komissiyasigina qandaydir qadamlar qo‘ymasligini lozim. Masalan, avvalroq bokschi Jon Kuni ringda olgan jarohatlaridan so‘ng shu tarzda vafot etgandi. Umuman olganda, fojiali hodisalar ko‘p, faqat bu safar bir vaqtning o‘zida bitta karddan uch bokschi kasalxonaga tushib qoldi, ikkita nafari esa vafot etdi. Boks bu juda xavfli sport turlaridan biri ekanligi yana bir bor yodga olindi.
Izoh (0)