Navoiy viloyat IIB YHXB matbuot guruhi rahbari Farrux Yoqubovning “Daryo”ga xabar berishicha, Xatirchida avtomashina haydovchisining tezlikni oshirishi oqibatida velosipedchi vafot etgan.
Ta’kidlanishicha, 2021-yilning 10-aprel kuni soat 20:30 da fuqaro F.Z. boshqaruvida bo‘lgan Nexia-3 Xatirchi tumani hududidan o‘tuvchi 4R48 avtomobil yo‘lining 148-kilometrida velosipedda harakatlanib ketayotgan fuqaro S.F.ni urib yuborgan. YTH oqibatida velosipedchi og‘ir tan jarohati olgan va tuman markaziy shifoxonasining jonlantirish bo‘limiga yotqizilib, ko‘rsatilgan yordamga qaramay vafot etgan.
Mazkur holat yuzasidan Xatirchi tuman prokuraturasi tomonidan fuqaro F.Z.ga nisbatan Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan.
“Navoiyda velosiped bilan bog‘liq ko‘ngilsiz holatlar juda ko‘p sodir bo‘lmoqda. Shu sabab velosipedchilarga mazkur transport vositasini nur qaytaruvchi vositalar, orqa tomonni ko‘ruvchi oyna, qo‘ng‘iroq bilan jihozlashlarini, o‘zlari esa boshiga shlem hamda egniga nur qaytaruvchi nimcha kiygan holda harakatlanishlari lozimligini so‘raymiz. Bu ko‘ngilsizlik xavfini kamaytirishga xizmat qiladi”, — dedi Farrux Yoqubov.
Avvalroq Farg‘onada Lacetti yo‘lni kesib o‘tayotgan 12 yoshli velosipedchini urib ketgani va velosipedchi vafot etgani xabar berilgandi.
Izoh (0)