Навоий вилоят ИИБ ЙҲХБ матбуот гуруҳи раҳбари Фаррух Ёқубовнинг «Дарё»га хабар беришича, Хатирчида автомашина ҳайдовчисининг тезликни ошириши оқибатида велосипедчи вафот этган.
Таъкидланишича, 2021 йилнинг 10 апрель куни соат 20:30 да фуқаро Ф.З. бошқарувида бўлган Nexia-3 Хатирчи тумани ҳудудидан ўтувчи 4R48 автомобиль йўлининг 148-километрида велосипедда ҳаракатланиб кетаётган фуқаро С.Ф.ни уриб юборган. ЙТҲ оқибатида велосипедчи оғир тан жароҳати олган ва туман марказий шифохонасининг жонлантириш бўлимига ётқизилиб, кўрсатилган ёрдамга қарамай вафот этган.
Мазкур ҳолат юзасидан Хатирчи туман прокуратураси томонидан фуқаро Ф.З.га нисбатан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган.
«Навоийда велосипед билан боғлиқ кўнгилсиз ҳолатлар жуда кўп содир бўлмоқда. Шу сабаб велосипедчиларга мазкур транспорт воситасини нур қайтарувчи воситалар, орқа томонни кўрувчи ойна, қўнғироқ билан жиҳозлашларини, ўзлари эса бошига шлем ҳамда эгнига нур қайтарувчи нимча кийган ҳолда ҳаракатланишлари лозимлигини сўраймиз. Бу кўнгилсизлик хавфини камайтиришга хизмат қилади», — деди Фаррух Ёқубов.
Аввалроқ Фарғонада Lacetti йўлни кесиб ўтаётган 12 ёшли велосипедчини уриб кетгани ва велосипедчи вафот этгани хабар берилганди.
Изоҳ (0)