Грузия коронавирус пандемиясининг учинчи тўлқинига дуч келди, дея маълум қилди мамлакат касалликлар ва жамоатчилик соғлиғи устидан назорат миллий маркази раҳбари Амиран Гамкрелидзе. «Мамлакатда учинчи тўлқин бошланиб бўлди, аммо кенг кўламли эпидемия юзага келмаслиги учун у максимал даражада бошқарилувчан бўлишини хоҳлардик», — деди у.
Инфекциянинг фаол тарқалишига аҳолининг тўйлар, маъракалар, туғилган кунлар ва бошқа тадбирлар баҳонасида оммавий йиғилишлари сабаб бўлмоқда, деди у. Бундан ташқари, Гамкрелидзенинг айтишича, сўнгги вақтларда вирус билан касалланиш ҳолатларининг кўпчилиги COVID-19’нинг «британча» штамми билан боғлиқ бўлмоқда.
Сўнгги маълумотларга кўра, жами аҳолиси 4 миллион кишига тенг бўлган Грузияда пандемия бошидан буён 288 минг киши касалланган, шуларнинг 3877 нафари вафот этган.
Сўнгги бир кеча-кундузда мамлакатда 707 киши коронавирусни юқтириб олди (бир кун аввал — 506 киши).
Грузияда COVID-19’га қарши эмлаш 15 мартда бошланган эди.
Германияда пандемия бошидан буён коронавирус тасдиқланган кишилар сони 3 миллиондан ошди. Роберт Кох институти маълумотлари шу ҳақда гувоҳлик бермоқда. Жонс Ҳопкинс университети маълумотлари бўйича ҳам Германияда касалланганлар сони 3 миллионлик маррадан ўтиб, 3 015 475 кишига етган.
Ўтган бир кеча-кундузнинг ўзида 13 245 киши вирусни юқтириб олган, 99 киши вафот этган. Коронавирус оқибатида вафот этганларнинг умумий сони 78 452 кишига етди. 2 683 900 киши эса соғайди.
Коронавирусга қарши Pfizer вакцинасининг харид баҳоси Евроиттифоқ учун 12 евродан 19,5 еврогача кўтарилди. Болгария бош вазири Бойко Борисовнинг айтишича, айнан шу нархда Еврокомиссия Pfizer билан 2022 ва 2023 йилларда вакцина етказиб бериш бўйича шартнома имзолаган.
«Pfizer’да нарх дастлаб 12 евро эди. Кейин 15,50 евро бўлди. Энди эса 900 миллион доза вакцинани 19,50 евро нархда етказиб бериш ҳақида шартномалар имзоланяпти», — деди Борисов.
У вакцинанинг нархи ҳақида Pfizer Болгарияга 2,7 миллион доза вакцина етказиши ҳақида гапираётиб айтиб ўтди. Аслида Евроиттифоқ вакциналар қийматини ошкор қилмайди — етказиб берувчи компанияларнинг шартлари шуни талаб қилади.
Шунингдек, Чехияда COVID-19 пандемияси туфайли киритилган фавқулодда ҳолат режими якунланди. 12 мартдан буён амал қилиб келган фавқулодда ҳолат 11 апрель куни ярим тунда ниҳоясига етди. Шу муносабат билан мамлакатда мактаблар, боғчалар, музейлар, , ҳайвонот боғлари, спорт муассасалари, дўконлар, дорихоналар ва бозорлар чекланган режимда ишлашни бошлайди.
Нидерландияда эса коронавирус тарқалишига қарши кураш доирасида чеклов чораларини 21 апрелдан юмшатмасликка қарор қилишди. Аввалроқ ушбу санадан комендантлик соати бекор қилиниб, кафе ва ресторанлар айвонлари очилиши кутилаётган эди. «Бунинг учун ҳали жуда эрта. Коронавирус билан касалланишнинг авж нуқтасидан ўтиб бўлганимизча йўқ», — деди вазирлар маҳкамаси вакили.
Германия канцлери коронавирусга қарши эмланиш учун рўйхатдан ўтиб, сўнг уни бекор қилгани хабар берилмоқда. 1954 йил 17 июлда туғилган (канцлернинг маълумотлари билан бир хил) Ангела Меркель исмли бемор 11 апрель, якшанба кунига эмланиш учун ёзилган (у ёзилган вакцинация марказида AstraZeneca компанияси вакцинаси қўлланилади), аммо махсус портал орқали ёзувни бекор қилган. Bild нашри канцлер Христиан-демократик иттифоқи ва Христиан-социалистик иттифоқи блокининг ёпиқ мажлиси туфайли эмланиш учун боролмаганини ёзмоқда.
Изоҳ (0)