Shahrixonda mahalliy aholi tomonidan “Alvasti ko‘prik” deb ataluvchi Shahrixonsoy ustidan o‘tuvchi ko‘prik o‘rniga yangisi qurildi, deb xabar beradi “O‘zbekiston temir yo‘llari” AJ matbuot xizmati.
Ma’lum qilinishicha, “O‘zbekiston temir yo‘llari” AJga qarashli “Ko‘prikqurilish” tresti unitar korxonasi tomonidan Andijon viloyatining Shahrixon tumanidagi “Qo‘rg‘oncha” mahallasida o‘nlab yillar davomida yechimi topilmagan muammo bir oy davomida hal etilgan — bu yerdan oqib o‘tuvchi Shahrixonsoy kanali ustidan o‘tuvchi yangi ko‘prik qad rostlagan.
Mahalliy aholi tomonidan ushbu ko‘prikka “Alvasti ko‘prik” nomi berilgan, chunki atigi bir oy oldin ham hatto undan qanday o‘tishni o‘ylashning o‘zi odamni qo‘rquvga solgan. Eski ko‘prikdan faqat piyodalar foydalangan va ushbu ko‘prik xavfsizlik talablariga umuman javob bermagan.
O‘zbekiston Prezidentining tashabbusi bilan “O‘zbekiston temir yo‘llari” AJ yangi qurilgan ko‘prik nafaqat piyodalar uchun, balki mahalliy aholiga yanada qulaylik yaratish maqsadida avtotransport vositalari harakatlanishi uchun ham sharoit yaratilgan. Mazkur inshoot 50-60 tonnagacha bo‘lgan yukni bemalol ko‘tara olish imkoniyatiga ega.
Mutaxassislarning ma’lum qilishicha, eni 7 metr, uzunligi 32 metrdan iborat ushbu temir-beton ko‘prik 60-70 yil davomida xalqqa muammosiz xizmat qiladi.
Avvalroq Qamashidagi homilador ayollarni olib o‘tib bo‘lmaydigan jin ko‘prik 5,4 milliard so‘mga qayta qurilagani to‘g‘risida xabar berilgandi.
Izoh (0)