Украиналик тадбиркор ва сиёсатчи Александр Онишченко Ўзбекистонга кўчиб келди. Бу ҳақда унинг «Strana.ua»га берган интервьюсига таяниб, Spot хабар берди.
Александр Онишченко ким?
Онишченко 1969 йилда Россияда туғилган. 1990 йилдан бошлаб ёқилғи ва энергетика соҳасидаги бизнес билан шуғулланади.
2007 йилда Украина ФВВ вазири ёрдамчиси лавозимига тайинланган. 2014 йилда Украина Олий радаси халқ депутатига айланган. 2016 йилда мамлакатни тарк этган. 2017 йилда номи ошкор этилмаган мамлакатдан сиёсий бошпана олган.
2021 йил бошида АҚШ Молия вазирлигининг SDN List санкциялар рўйхатига киритилган бўлиб, унга кўра, Қўшма Штатлардаги активлари блокланган, шунингдек, Америка фуқароларининг у билан бирор операцияни ўтказиши тақиқланган.
«Фокус» журнали унинг исмини икки марта — 2011 ва 2012 йилларда Украининг энг бой инсонлари рўйхатига киритган. Бизнесменнинг тўлиқ биографияси билан қуйидаги ҳавола орқали танишиш мумкин.
«Украинадаги биринчи бизнесим Ўзбекистон ва Туркманистонга боғлиқ. Шу маънодаки, секин-аста илдиз отиб, Туркманистондан Украинага газ экспорт қилишни бошладим», — дейди у.
Тадбиркор ўзининг кўчиб ўтишини Европа Иттифоқида бизнес инқирози юз бераётгани билан изоҳланган — коронавирус иқтисодиётни яксон қилган, сўнгги ярим йилда барчаси қулаган, Ўзбекистонда эса пандемия якунланиб, иқтисод гуллаб-яшнашни бошлагандек гўё.
«Бу ерда барча табиий танланиш ҳисобига касалликка чалиниб, соғайгандек. Кеча бокс кечасида бўлдим. Ўн минг одам спорт саройида. Ҳеч қандай ваҳима йўқ. Бундан олдин ўн минг киши Николай Басковнинг концертида йиғилганди. Барча ресторанлар очиқ, барчаси ишлаяпти. Иқтисод ривожланмоқда. Сиз катта иқтисодий кўргазма бошланишига етиб келдингиз (гап ‘Иннопром’ ҳақида кетмоқда — таҳр)», — дейди Онишченко.
«Ҳукумат хусусийлаштириладиган объектлар рўйхатини эълон қилади. Ўзбекистон чегараларни очмоқда», — дейди Онишченко.
Тадбиркорнинг айтишича, унинг мамлакатга шахсий қизиқишлари бор (олтин, кимё саноати, минерал ўғитлар), шунингдек, инвесторлар номидан иш олиб бормоқда (уларни мамлакат иқтисодиёти билан таништирмоқда). Унинг сўзларига кўра, бу ерда «ақл бовар қилмас бозор очилган»: «Хитой ва Қозоғистон барча нарсани сотиб оляпти. Европа бозори Россия ва собиқ МДҲ давлатлари учун ёпилишни бошлади. Улар тўлиқ Хитой ва Яқин Шарқ мамлакатлари тарафи ўтди, ўз маҳсулотларини кенг кўламли экспорт қилмоқда: газ, электр энергияси. Ҳозирда Ўзбекистон инвесторларни жалб этиш учун глобал хусусийлаштиришни тайёрламоқда. Юзлаб объектлар сотувга қўйилади. Бу ерда ‘Газпром’, ‘Лукойл’, ‘Росатом’ кириб улгурди, кирганлар иқтисодиётга катта маблағ киритмоқда», — дейди у. Онишченконинг сўзларига кўра, бу ҳокимият туфайли амалга оширилмоқда.
Онишченконинг айтишича, иш кунлари у Ўзбекистонда, дам олиш кунлари эса Европада бўлмоқда. Унга бу ерда нима ёқиши борасидаги саволга тадбиркор «нархлар ҳамёнбоп, мазали ошхона ва барчаси бор, шунингдек, отаси олдида эканлигини» таъкидлаган.
От спорти
Александр Онишченко 1998 йилдан буён от спорти билан профессионал равишда шуғулланиб келади. Украина от спорти федерацияси президенти ҳам бўлган, икки маротаба Олимпиада ўйинларида иштирок этган, кўплаб халқаро мусобақалар ғолиби ва совриндори.«Эндиликда ҳаракатларим ва имкониятларим Ўзбекистонга қаратилади. Бу ерда от — эъзозланадиган ҳайвон. Отда чиқиш қилган инсон — барча гуноҳлари кечириладиган тақводор ҳисобланади», — дейди Онишченко.
У мамлакатда от спорти ўртача ривожлангани тўғрисидаги саволга қўшилган, мамлакатда энди-энди отларни сотиб олиб, инфратузилма ва спортчиларга сармоя киритаётган бизнесменлар пайдо бўлмоқда.
Онишченконинг сўзларига кўра, унга турли мамлакатлар терма жамоаларидан, хусусан, Ўзбекистондан таклифлар тушмоқда. Онишченко рози бўлишини истисно этмаган, чунки отаси сабаб фуқароликни осонликча олиши мумкин, бироқ ҳозир яхшилаб ўйлаб кўриб, қарор қабул қилишга вақт бор.
Шунингдек, у ҳозирда 52 ёшда эканлигини ва сиёсат билан шуғулланишни истамаслигини таъкидлаган. «От спорти ва бизнес. Менга шу етарли», — дейди Онишченко.
Аввалроқ Жанубий Африкада таъқиб қилинаётган ака-ука Гупталар Ўзбекистонга келгани тўғрисида хабар берилганди.
Изоҳ (0)