Швейцарияда 50 дан зиёд одам коронавирусга қарши эмланганидан кейин вафот этди. Бу ҳақда Swissmedic давлат фармацевтик регулятори хабар берган.
Швейцария фармацевтика соҳасида ваколатли ташкилот бўлган Swissmedic вакцинациядан кейинги ножўя таъсирлар юзасидан 1174 та хабарномани ўрганиб чиққан ва 577 та ҳолат Pfizer/BioNTech вакцинасидан кейин, 580 таси эса Moderna билан эмланишдан кейин кузатилганини билдирган, 17 та ҳолатда одамларнинг айнан қайси вакцина билан эмлангани бўйича ахборот берилмаган.
«55 та ҳолатда одамлар вакцинациядан кейин маълум вақт ўтач вафот этган. Ўлганларнинг ўртача ёши 84 га тенг ва уларнинг деярли ҳаммаси жиддий сурункали касалликлар билан оғриган», — дейилади Swissmedic ахборотида.
Қайд этилишича, ҳар бир ҳолат чуқур таҳлил қилинган. Тахминларга кўра вакцинация қилинган беморларнинг ўлимига юрак қон-томир касалликлар ёки ўпка ва нафас йўлларидаги касалликлар сабаб бўлган. Swissmedic берган маълумотларда вакцинациянинг одамлар ўлимига олиб келгани юзасидан аниқ далиллар келтирилмаган.
Аввал Австрияда 40 нафар одамнинг коронавирусга қарши эмлаш ўтказилганидан кейин вафот этгани хабар қилинганди. 2020 йил 12 декабрдан 2021 йил 26 февралгача мамлакатда Pfizer/BioNTech препарати билан эмланган 41 нафар киши оламдан кўз юмган. Вафот этганларнинг 11 нафари COVID-19 коронавирус инфекциясининг инкубацион даври давом этаётган вақтда эмлангани туфайли ўлим ҳолатлари қайд этилган. Яна 19 кишида жиддий касалликлар мавжуд бўлган ва ўлим ҳолатлари уларнинг асоратлари оқибатида кузатилган. Шунингдек, АҚШда Johnson & Johnson билан эмланганларда ножўя таъсирлар пайдо бўлгач, иккита вакцинация маркази ёпилган.
Изоҳ (0)