AQSh 2017-yildan buyon Eronga qarshi kiritgan barcha sanksiyalarini bekor qilishga tayyor emas, deb ta’kidladi Davlat departamenti vakili jurnalistlarga. Bu haqda “Interfaks” xabar berdi.
Venada Eron yadro dasturi bo‘yicha Qo‘shma harakatlar rejasi (QHR) shu hafta o‘z ishini qayta boshladi. Asosiy masala AQShni QHRga qaytarish uchun amalga oshirilishi mumkin bo‘lgan choralarni ishlab chiqish hisoblanadi. Ma’lumot uchun, 2018-yilda sobiq davlat rahbari Donald Trampning tashabbusi bilan AQSh QHRdan chiqib ketgan edi.
Eron barcha sanksiyalarning bekor qilinishini da’vo qilmoqda, shuningdek, hukumat birinchi qadamni AQSh qo‘yishi kerak, deb hisoblaydi. AQSh rasmiylari esa Tehronning QHR shartlariga to‘liq rioya qilishini talab qilyapti.
Komissiya ishida Eron, Rossiya, Xitoy, Fransiya, Germaniya va Buyuk Britaniya davlatlari ishtirok etmoqda. AQSh esa bu ishda qatnashmayapti, lekin hukumat delegatsiyasi kelishuv a’zolarining ba’zilari bilan norasmiy uchrashuv o‘tkazish uchun Venaga keldi. Eron delegatsiyasi bilan uchrashish rejalashtirilmagan.
Davlat departamenti vakili, AQSh “Eronning QHRni qayta tiklashga jiddiy kirishganining ba’zi alomatlari”ni ko‘rganini, lekin bu “yetarli emas”ligini aytdi. Shuningdek, u Eronning barcha sanksiyalarni bekor qilish talabi ilojsizligini ta’kidladi.
“Agar Eron 2017-yildan buyon kiritilgan barcha sanksiyalarning bekor qilinishi bo‘yicha o‘z talabida qat’iy turib olsa, yo hech qanday kelishuv bo‘lmaydi, yo biz boshi berk ko‘chaga kirib qolamiz”, — dedi diplomat.
Uning aniqlik kiritishicha, muzokaralarda sanksiyalarni bekor qilish bo‘yicha aniq harakatlar emas, balki faqat Eron va AQShning bajarishi kerak bo‘lgan “harakatlar majmuasi” muhokama qilinmoqda.
Bryusselda chop etilgan Yevropa tashqi siyosiy xizmatining (YTSX) press-relizida yozilishicha, 9-aprel kuni yakunlangan komissiya majlisi “ijobiy holatni saqlab qolish uchun, kelayotgan haftada yana o‘tkaziladi”.
“QHR a’zolari so‘nggi uch kun ichida mutaxassislar tomonidan bajarilgan ishlarni sarhisob qildi va olingan dastlabki natijalarni mamnuniyat bilan taqdim etdi”, — deb yozdi BMT qoshidagi Atom energiyasi xalqaro agentligining Rossiyadagi doimiy vakili Mixail Ulyanov o‘zining Twitter sahifasida.
Avvalroq Eron yadroviy kelishuviga a’zo davlatlar AQShning ushbu bitimga qaytishiga yordam bermoqchiligini ma’lum qilgan edi. Eron AQShning Tehronga qarshi sanksiyalari bekor qilinmaguncha uranni boyitish darajasini 20 foizdan tushirmasligini aytgan.
Shuningdek, AQSh prezidenti Jo Bayden Eronga qarshi sanksiyalar muddatini bir yilga uzaytirishga qaror qildi. Eron Islom Respublikasi prezidenti Hasan Ruhoniy esa Uch yil oldin tiklangan AQSh sanksiyalari Eronga to‘g‘ridan to‘g‘ri 200 milliard dollardan oshiq zarar yetkazganini ma’lum qildi.
Ma’lumot uchun, Oq uy matbuot kotibi Jen Psaki AQShning Eron bilan diplomatik aloqalarga ochiqligi, ammo Tehronga qarshi joriy etilgan bir tomonlama sanksiyalarni yumshatmoqchi emasligi haqida aytib o‘tgan edi.
Izoh (0)