Buxoro tumanida mansabdor tanishlari orqali 41 ming 500 dollar evaziga 4 gektar yer olib berishni va’da qilgan shaxs oldindan 1000 dollar olayotgan vaqtida qo‘lga olindi. Holat Bosh prokuratura huzuridagi departamentning tuman bo‘limi, DXX hamda Milliy gvardiya viloyat boshqarmasi xodimlari hamkorligidagi tadbirda fosh etildi, deya xabar berdi “Daryo” muxbiri.
Ta’kidlanishicha, Buxoro tumanidagi Chexoncha qishlog‘ida yashovchi, viloyat yer resurslari kadastri sobiq mutaxassisi, fuqaro A.A. Buxoro shahrida yashovchi 31 yoshli H.Ch.ga mahalla hududidagi fermer xo‘jaligi hisobida bo‘lgan bog‘dorchilik uchun mo‘ljallangan 4 gektar yer maydonini issiqxona qurish uchun olib berishni va’da qilgan. Va A.A. bu ishni vakolatli mansabdor tanishlari orqali amalga oshirishga uni ishontirgan hamda kelishilgan puldan 1000 dollarini oldindan to‘lash talabini qo‘ygan.
DXX hamda Milliy gvardiyaning viloyat boshqarmasi hamda departamentning tuman bo‘limi xodimlari tomonidan o‘tkazilgan tezkor tadbirda fuqaro A.A. Buxoro tumanidagi “Parizod” savdo majmuasi yonida H.Ch.dan kelishilgan pulning 1000 dollarini olayotgan vaqtida ushlangan.
Mazkur holat yuzasidan departamentning Buxoro tuman bo‘limi tomonidan fuqaro A.A.ga nisbatan Jinoyat kodeksining 211-moddasi (pora berish) 3-qismi bilan jinoyat ishi qo‘zg‘atilib, dastlabki tergov harakatlari olib borilmoqda.
Izoh (0)