«Иннопром — Ўзбекистон катта саноат ҳафталиги» халқаро саноат кўргазмасининг биринчи кунида «Ўзбекнефтгаз» АЖ стендида Россия Федерациясининг Челябинск вилояти ҳукумати делегацияси билан музокаралар ўтказилди.
Челябинск вилояти губернаторининг ўринбосари Е. В. Ковальчук бошчилигидаги делегация таркибидан мазкур ҳудуднинг йирик саноат корхоналари, хусусан, «Русекспорт» МЧЖ, «Челябинский трубопрокатний завод» МЧЖ, «Уральский автомобилний завод» АЖ, «Копейский машиностроительний завод» ОАЖ, «Уралспецмаш» АЖ, «Челябинский строительно-дорожние машини» ЁАЖ каби корхоналарнинг раҳбарлари ўрин олган.
Музокаралар давомида Челябинск вилояти корхоналари ва «Ўзбекнефтгаз» АЖ ўртасида саноат кооперацияси алоқаларини кенгайтириш, хусусан, бурғилаш, қазиб олиш ва қайта ишлаш жараёнларида кенг қўлланиладиган маҳсулотлар, махсус техникалар, асбоб ускуна ва материалларни етказиб бериш, биргаликда ишлаб чиқариш ва таъмирлаш истиқболлари муҳокама қилинди.
Учрашувда меҳмонларга «Ўзбекнефтгаз» АЖ тизимида амалга оширилаётган трансформация жараёнлари, инвестиция лойиҳалари, харидлар ва тижорат йўналишида олиб борилаётган комплаенс тадбирлар бўйича ахборот берилди. Маҳсулотлар, бутловчи қисм ва материалларга бўлган эҳтиёжларни онлайн ўрганиш мақсадида ташкил этилган ung.cooperation.uz виртуал кўргазмасининг имкониятлари ҳақида маълумотлар берилди.
Учрашув якунида «Ўзбекнефтгаз» АЖ ва Челябинск вилояти саноат корхоналари ўртасида ҳамкорликни кенгайтириш бўйича бир қатор амалий келишувларга эришилди.
Эслатиб ўтамиз, Челябинск вилояти Урал федерал округи таркибидаги ҳудуд бўлиб, Европа ва Осиё минтақасининг чегарасида жойлашган. Мазкур ҳудудда аграр-иқтисодиёт, қора металлургия, машинасозлик, атом саноати, кимё, енгил саноат, озиқ-овқат саноати йўналишидаги йирик ишлаб чиқариш корхоналари жойлашган.
«Иннопром — Ўзбекистон катта саноат ҳафталиги» халқаро саноат кўргазмаси доирасида икки томонлама учрашувлар давом этмоқда.
«Ўзбекнефтгаз» АЖ матбуот хизмати
Изоҳ (0)