Internetda Dubaydagi omborlarning birida Kristian Beyl ijrosidagi superqahramon harakatlangan “Betmobil”ni chang bosib yotgani tasvirlangan surat paydo bo‘ldi, deb xabar beradi Motor.
E’lon qilingan suratga ko‘ra, superqahramonning mashinasi uzoq vaqtdan beri omborda harakatsiz turgan. Mashinani qalin chang va qum qoplagan. Biroq “Betmobil” tashlandiq emas. Ma’lum bo‘lishicha, mashinaning egasi mavjud bo‘lib, u vaqti-vaqti bilan mazkur transport vositasida shahar bo‘ylab harakatlanib turadi, biroq unga deyarli e’tibor qaratmaydi.
Mutaxassislarning fikricha, Dubayda aniqlangan “Betmobil” Kristofer Nolanning “Qora ritser” trilogiyasining suratga olish ishlarida qatnashgan mashina bo‘lishi mumkin. Ehtimol, kinofranshizada bosh rolni ijro etgan Kristian Beyl aynan shu avtomobilda harakatlangan. Boshqa versiyaga ko‘ra, ushbu transport vositasi kinokompaniya ruxsati bilan yaratilgan beshta nusxadan biri bo‘lishi mumkin. Bu kabi avtomobillarning har biri 2014-yilda million dollardan sotilgan edi.
“Betmobil” nusxalariga Chevrolet Corvette’ning 500 ot kuchini taqdim etishga qodir 5,7 litrli V8 dvigatellari o‘rnatilgan. Mashinaning maksimal tezligi soatiga 250 kilometrni tashkil etadi. Bundan tashqari, superqahramon mashinasi 44 dyuymli yo‘ltanlamas “pokrishka”lari bilan jihozlangan.
Izoh (0)