Интернетда Дубайдаги омборларнинг бирида Кристиан Бэйл ижросидаги суперқаҳрамон ҳаракатланган «Бетмобил»ни чанг босиб ётгани тасвирланган сурат пайдо бўлди, деб хабар беради Motor.
Эълон қилинган суратга кўра, суперқаҳрамоннинг машинаси узоқ вақтдан бери омборда ҳаракатсиз турган. Машинани қалин чанг ва қум қоплаган. Бироқ «Бетмобил» ташландиқ эмас. Маълум бўлишича, машинанинг эгаси мавжуд бўлиб, у вақти-вақти билан мазкур транспорт воситасида шаҳар бўйлаб ҳаракатланиб туради, бироқ унга деярли эътибор қаратмайди.
Мутахассисларнинг фикрича, Дубайда аниқланган «Бетмобил» Кристофер Ноланнинг «Қора рицер» трилогиясининг суратга олиш ишларида қатнашган машина бўлиши мумкин. Эҳтимол, кинофраншизада бош ролни ижро этган Кристиан Бэйл айнан шу автомобилда ҳаракатланган. Бошқа версияга кўра, ушбу транспорт воситаси кинокомпания рухсати билан яратилган бешта нусхадан бири бўлиши мумкин. Бу каби автомобилларнинг ҳар бири 2014 йилда миллион доллардан сотилган эди.
«Бетмобил» нусхаларига Chevrolet Corvette’нинг 500 от кучини тақдим этишга қодир 5,7 литрли V8 двигателлари ўрнатилган. Машинанинг максимал тезлиги соатига 250 километрни ташкил этади. Бундан ташқари, суперқаҳрамон машинаси 44 дюймли йўлтанламас «покришка»лари билан жиҳозланган.
Изоҳ (0)