Internetda Janubiy Kaliforniyadagi uylardan biriga noyob mototsikllar kolleksiyasini tomosha qilish uchun kelib, u yerda 1955-yilgi qizil Porsche 550 Spyder’ga duch kelgan erkakning videosi paydo bo‘ldi, deb xabar beradi Motor.
Topilmaga Robert Grin ismli amerikalik duch kelgan. Erkak noyob mototsikllar kolleksiyasi bilan tanilgan. Yangi nusxalarni topish ilinjida u Janubiy Kaliforniyaga otlangan va uning e’tiborini qurilish konteyneri tortgan. Uni ochgan erkak o‘z ko‘zlariga ishonmagan. Konteyner ichida 1955-yilgi qizil Porsche 550 Spyder 35 yildan buyon harakatsiz turgan.
Ikki o‘rindiqli sportkar 69-seriyadan. Ishlab chiqarishning uch yili davomida nemis kompaniyasi Porsche 550 Spyder’ning jami 90 nusxasini yig‘gan. Porsche’ning birinchi egasi gavayilik ayol bo‘lib, u avtomobildan havaskorlik poygalarida foydalangan. 1963-yilda noyob modelni ikki ming dollar evaziga Les Gannerson ismli erkak sotib olgan va 1980-yillarda mashinani to‘liq restavratsiya qilgan. Shundan so‘ng u mototsikllar kolleksiyasiga qiziqib qolgan, Porsche esa yuk konteyneridan o‘rin olgan.
Uzoq yillar davomida bir joyda turgan Porsche 550 Spyder ajoyib holatda saqlangan. Sportkar kuzovida zanglash alomatlari yo‘q. Avtomobil 135 ot kuchiga ega 1,5 litrli original dvigatel yordamida harakatga keladi. Agregat besh pog‘onali mexanik uzatmalar qutisi yordamida boshqariladi. Orqa uzatmali sportkarning maksimal tezligi soatiga 220 kilometrni tashkil etadi.
Robert Grin ushbu Porsche’ni “asr topilmasi” deya ta’riflagan. Uning so‘zlariga ko‘ra, eksklyuziv sportkar hozirda o‘ziga yangi xo‘jayin topgan. Kolleksioner xarid qanchaga amalga oshirilganini oshkor etmagan, biroq bu kabi modellar auksionlarda bir necha million dollar turadi.
Mavzuga doir:
Izoh (0)