Professional boksning og‘ir vazn toifasida (+90,7 kg) harakat qilib kelayotgan Bahodir Jalolov (8-0, 8 KO) 3-aprel kuni Toshkentdagi Humo Arena’da tashkil etilgan boks kechasida ringga ko‘tarildi.
O‘zbekistonlik bokschiga latviyalik Kristaps Zuits (7-2-2, 7 KO) raqib bo‘ldi.
Dastlabki raund to‘liq Jalolovning ustunligida o‘tdi. Ikkinchi raund debyutida Bahodir kuchli zarbasi bilan raqibini nokdaun holatiga tushirdi. Jalolov bu vaziyatdan bazo‘r o‘ziga kelgan latviyalik bokschiga bosimni davom ettirdi va ikkinchi urinishda Zuitsni nokautga uchratdi.
Shu tariqa Bahodir prof boksdagi 8-jangini ham nokautli g‘alaba bilan yakunladi.
Eslatib o‘tamiz, Bahodir Jalolov professional boksdagi bundan avvalgi jangini 2020-yil 13-dekabrida Uilfredo Lilga (10-18-3, 8 KO) qarshi o‘tkazib, raqibini 1-raunddayoq nokautga uchratgandi.
Avvalroq professional boksda debyut jangini o‘tkazgan Iqboljon Xoldorov tanzaniyalik raqibini nokautga uchratgan, Sanjar Tursunov ukrainalik bokschini mag‘lub etgan, Hasanboy Do‘stmatov esa nokaut bilan g‘alaba qozonib WBA International kamariga ega chiqdi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)