AQSh prezidenti Donald Tramp Eron bilan yadro qurolidan voz kechish bo‘yicha yangi bitim tuzishga va’da berdi. “RBK”ning xabar berishicha, bu haqda davlat rahbari o‘zining saylovoldi tashviqoti doirasida Pensilvaniyada bo‘lib o‘tgan miting paytida aytgan.

Foto: Getty Images

“Men ular (Eron) kuchli, buyuk mamlakat bo‘lishini xohlayman. Biz g‘alaba qozonishimiz bilanoq birinchi qo‘ng‘iroq Eron bilan bo‘ladi va biz kelishuvga erishamiz”, — degan u.

Tramp, shuningdek, AQSh sanksiyalari tufayli Eronning YaIM 27 foizga pasayganini ta’kidlagan. Prezident davlatga farovonlik istashini, ammo Eron yadro quroliga ega bo‘lishi mumkin emasligini bildirgan.

AQShning Eron bo‘yicha maxsus vakili Brayan Xuk ham AQSh hech qachon Eronga yadro quroliga ega bo‘lishga imkon bermasligi va buning uchun kuch ishlatishga ham tayyorligini ma’lum qilgandi.

2015-yilda AQSh, Fransiya, Buyuk Britaniya, Germaniya, Xitoy va Rossiya Eron Yadro dasturi bo‘yicha qo‘shma harakat rejasi (JCPOA) tuzgan bo‘lib, unga ko‘ra davlatlar Eronning yadro qurolidan voz kechishi evaziga unga qarshi sanksiyalar joriy etmaslikka kelishgandi.

Oradan uch yil o‘tgach, AQSh Eronni shartnomani buzganlikda ayblab, kelishuvdan chiqdi. Vashington, shuningdek, BMTning Tehronga qarshi sanksiyalarini tiklash niyatida ekanligini e’lon qilgan.

Oktabr oyida Pompeo AQSh Eronga qurol-yarog‘ yetkazib berishga aloqador jismoniy va yuridik shaxslarga nisbatan sanksiyalar qo‘llashini e’lon qildi.

Eron mudofaa vaziri Amir Hotamiy Tehron qurol-yarog‘ga qo‘yilgan embargo bekor qilinganidan so‘ng, asosan, qurol xarid qilish emas, balki sotish bilan shug‘ullanishni rejalashtirayotganini ma’lum qilgan. Shuningdek, Eron “raketa yetakchiligi” bo‘yicha o‘ziga e’tibor tortishini,  uchuvchisiz boshqariladigan uchish qurilmalarini yaratishda dunyo bo‘yicha “kuchli beshlikka” kirishini bildirgan.