Эрон ядровий келишувига аъзо давлатлар АҚШнинг ушбу битимга қайтишига ёрдам бермоқчилигини маълум қилди. Бу ҳақда Европа Иттифоқи ташқи сиёсати хизматининг Қўшма комиссия йиғилиши якунлари бўйича баёнотида эълон қилинди, деб ёзади «РБК».
Хабарга кўра, ядро шартномаси бўйича музокаралар келаси ҳафта Австрия пойтахти Венада бўлиб ўтади. Музокаралар давомида «санкцияларни бекор қилиш ва ядровий мажбуриятларни бажариш» сингари келишувни амалга ошириш бўйича чораларни белгилаб олиш кутилмоқда. «Шу муносабат билан координатор Венада қўшма ҳаракат режасининг барча иштирокчилари АҚШ билан индивидуал алоқаларни кучайтиради», — дейилади Евроиттифоқнинг ташқи сиёсат хизматида.
АҚШ Венадаги музокараларда воситачилар орқали иштирок этиш режаларини тасдиқлади. «АҚШ Давлат департаменти ҳозирча Эрон билан тўғридан-тўғри музокараларга умид боғламайди, аммо бу имкониятга очиқ бўлиб турибди», — дейди департамент вакили.
Эрон ядро дастури бўйича кенг қамровли қўшма ҳаракатлар режаси бўйича Қўшма комиссия йиғилиши 6 апрель куни кундузи Венадаги сиёсий директорлар даражасида бўлиб ўтади», — деди Россиянинг Венадаги халқаро ташкилотлардаги доимий вакили Михаил Улянов «РИА Новости»га. Унинг сўзларига кўра, музокаралар АҚШнинг ядровий келишувга қайтиши бўйича «масалани экспертиза асосида ўрганиш»ни ўз ичига олади.
Маълумот учун, 2015 йилда АҚШ, Франция, Буюк Британия, Германия, Хитой, Россия ва Эрон ядро дастури бўйича қўшма ҳаракатларни имзолаган эди. Шартномага биноан, Теҳроннинг ядро қуролидан воз кечиши эвазига мамлакатлар унга қарши санкцияларни қўлламасликка ваъда берди. 2018 йилда Дональд Трамп даврида Қўшма Штатлар Эронни келишувни бузганликда айблаб, шартномадан чиқди ва унга қарши санкцияларни қайта тиклади. Теҳрон, ўз навбатида, келишувнинг айрим шартларини бажаришдан бош тортди.
Bloomberg АҚШнинг янги президенти Жо Байден маъмурияти ядровий келишувни қайта тиклашга қадам қўйиш ниятидалигини айтганди. Шу билан бирга, Вашингтон Теҳронга қарши санкциялардан ҳали воз кечмоқчи эмас, аммо унга Халқаро валюта фондидан олинган кредитлар ва COVID-19’га қарши курашиш учун гуманитар ёрдам кўрсатиш ҳақида ўйламоқда, деб хабар беради агентлик манбалари. Эрон расмийлари, ўз навбатида, санкцияларни бекор қилишни талаб қилмоқда.
Аввалроқ Эрон АҚШнинг Теҳронга қарши санкциялари бекор қилинмагунча уранни бойитиш даражасини 20 фоиздан туширмаслигини маълум қилганди. «Ураннинг 20 фоизга бойитилиши ядровий битимнинг 36-бандига мос келади ва агар АҚШ барча санкцияларни бекор қилсагина, бу фоиз пасайтирилади», — деди ҳукумат вакили.
Шунингдек, Европа Иттифоқининг доимий вакиллари қўмитаси Эронда инсон ҳуқуқларининг поймол қилиниш ҳолатлари кузатилган деб гумон қилган ҳолда саккиз нафар жисмоний ва уч юридик шахсга нисбатан чеклов чораларини қўллаш ҳақида қарор чиқарди. Санкциялар Евроиттифоқ кенгаши томонидан расман тасдиқланганидан кейин, яқин кунлар ичида кучга киради. Чекловлар Эронда 2019 йилда бўлиб ўтган норозилик намойишларини аёвсиз бостириш билан боғлиқ ҳаракатлар сабаб жорий қилинади.
Изоҳ (0)