Jahon sog‘liqni saqlash tashkiloti pandemiya sharoitida Ramazon oyini o‘tkazish bo‘yicha tavsiyalar berdi

Ushbu bahorda musulmonlar, nasroniylar va yahudiylar Pasxa, Peysax va Ramazon kabi diniy bayramlarni nishonlaydi. Jahon sog‘liqni saqlash tashkiloti (JSST)ning Yevropadagi byurosi, iymon va u bilan bog‘liq ijobiy his-tuyg‘ular kishilarning psixologik holatiga, ayniqsa, pandemiyadan charchagan hozirgi paytda ijobiy ta’sir ko‘rsatishini tan oladi. Shu bilan birga, hali emlash yakuniga yetmagani va virusning xavf darajasi kamaymagani sababli JSST mutaxassislari ehtiyot choralarini ko‘rish lozimligini ta’kidlamoqda.

Koronavirusga chalinish bo‘yicha yangi holatlarning o‘sib borayotganini hisobga olsak, bayramlar, ommaviy yig‘ilish va sayohatlar virus tarqalishini tezlashtirishi va yangi epidemiyalarni keltirib chiqarishi mumkinligi sir emas. Ayni paytda diniy rahbarlar ommaviy tantanalarni o‘tkazish bo‘yicha qaror qabul qilishda ijobiy va salbiy tomonlarni ko‘rib chiqmoqda. JSST kasallanish darajasi oshgan mamlakatlarda bayramlarni bekor qilish maqsadga muvofiq deb hisoblamoqda.

Biroq mutaxassislarning fikriga ko‘ra, qaysi davlatda bo‘lishidan qat’i nazar, barcha tadbirlar ochiq havoda o‘tkazilishi, ishtirokchilar soni va davomiyligi cheklanishi, shuningdek, kishilar oraliq masofani saqlash, qo‘llar gigiyenasiga rioya qilish va niqob taqish qoidalariga amal qilishi kerak. Bayramlarni tor doirada, oila a’zolari bilan nishonlash maqsadga muvofiqdir.

JSST ommaviy tadbirlarning yopiq joylarda nishonlanishi bir tom ostida yashamaydigan va yagona epidemiologik qoidalarga rioya qilmaydigan turli avlod vakillari yig‘ilganda, ayniqsa, xavf tug‘dirishini ta’kidladi. Bunday holatlarda kasallik yuqtirish xavfini kamaytirish uchun xonani tez-tez va yaxshilab shamollatish hamda mahalliy hokimiyatning boshqa tavsiyalariga amal qilish kerak.

Sayohat haqida gap ketganda, mutaxassislar jamoat transportidan, xususan, gavjumlikdan uzoq yurishni maslahat beradi. Ushbu sayohat qay darajada zarur ekani, uni keyinga qoldirish mumkinmi yoki yo‘qligini aniqlashtirish kerak. Bundan tashqari, JSST ko‘pgina mamlakatlarga faqat COVID-19 testining salbiy natijasi bo‘lgan taqdirda kirish mumkinligi, boshqalarda esa karantindan o‘tish talab qilinishini eslatib o‘tdi. Mutaxassislar mahalliy hokimiyat tomonidan kiritilgan barcha qoidalarga qat’iy rioya qilishga chaqirmoqda.

“Garchi bu yilgi bayramlar, odatdagidan farq qilsa-da, ularni barcha ehtiyot choralariga rioya qilgan holda nishonlash orqali o‘zingiz va yaqinlaringizni virusdan himoya qilishingiz mumkin”, — deya xulosa qildi JSST.