O‘zbekiston milliy teleradiokompaniyasi (MTRK) futbol bo‘yicha Yevropa Chempionlar Ligasi, Yevropa Ligasi, Konferensiyalar Ligasi, UEFA Superkubogi, UEFA yoshlar Ligasi kabi musobaqalarni 2021/22-yilgi mavsumdan boshlab O‘zbekiston hududida efirga uzatish huquqini sotib oldi.
Bu haqda “Sport” telekanali direktori Zohid Karimov o‘zining Twitter sahifasida rasman ma’lum qildi. Funksioner bu 1-aprel hazili emasligini alohida ta’kidlagan.
“Daryo” bu masalaga aniqlik kiritish uchun Zohid Karimov bilan bog‘landi. Telekanal direktori bu ma’lumot to‘g‘ri ekanligini rasman tasdiqladi.
Eslatib o‘tamiz, so‘nggi mavsumlar davomida UEFA tasnifidagi musobaqalar O‘zbekistonda faqat UzReport va Futbol-TV telekanallari tomonidan efirga uzatilayotgandi. Tahririyat manbalarining tasdiqlashicha, UzReport 2021/22-yilgi mavsum uchun Chempionlar Ligasi va Yevropa Ligasi translyatsiya huquqini sotib olmagan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)