Chet elda boshpanasiz qolgan o‘zbekistonlik migrantlarga moliyaviy yordam ko‘rsatiladi. Bu haqda 31-mart kuni “Yuksalish” umummilliy harakati binosida bo‘lib o‘tgan Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qo‘mitasining majlisida ma’lum qilindi, deb xabar beradi Repost.
“Xorijda boshpanasiz qolgan fuqarolarga boshpana, ya’ni hostellar (arzon otel) uchun 300 dollar to‘lab beriladi. Fuqaro murojaat qilgach, u ko‘rib chiqilib, pul fuqaroning plastik kartasiga yoki hostel hisob raqamiga o‘tkazib beriladi”, – deydi bandlik va mehnat vazirligi birinchi o‘rinbosari Erkin Muhitdinov.
Qayd etilishicha, vazirlik yaratgan veb-saytdan 30 mingga yaqin fuqaro foydalanmoqda. Ish beruvchilar bilan tuzilgan shartnomalar 160 tani tashkil etadi.
“Hozirda fuqarolarning chet elga ketishi uchun kasbiy va xorijiy bilim yetishmayapti. Bu ko‘plab fuqarolarimizning muammosi. Shu sababli mutlaqo ishsiz, ayollar daftari, temir daftarga kiritilgan hamda shu kabi ijtimoiy yordam zarur bo‘lgan fuqarolar uchun bepul o‘qitish tizimlari yo‘lga qo‘yilgan. Xarajatlar Bandlik vazirligining sug‘urta jamg‘armasidan qoplab beriladi”, – deydi Muhitdinov.
Ta’kidlanishicha, barcha viloyatlarda tashqi migratsiya agentlik vakolatxonalari huzurida alohida chiptaxonalar bor. Shuningdek, mehnat migrantlari uchun 20 foizlik chegirmalar asosida avia, temiryo‘l va avto chiptalari sotilmoqda.
Bundan tashqari, xorijdagi migrantlar uchun sug‘urta xizmati bepul amalga oshiriladi.
Mavzuga doir:
Izoh (0)