Andijon viloyati Marhamat tumanida tanishining suratini “50 000 so‘m evaziga fohishalik bilan shug‘ullanadi” yozuvi bilan tarqatib yuborgan 25 yoshli qiz ushlandi, deya xabar qilmoqda Tergov departamenti.
Qayd etilishicha, 25 yoshli N.T. Ichki ishlar boshqarmasiga ariza bilan murojaat qilib, bu haqda ma’lum qilgan. Uning arizasiga asosan, tanishi 25 yoshli M.T. uning surati ustiga “Nazokat 50 000 so‘m evaziga fohishalik bilan shug‘ullanadi” degan mazmunda yozuv, telefon raqami ko‘rsatilgan suratni Telegram ijtimoiy tarmog‘ining 1200 nafar obunachisi bo‘lgan guruhga joylab, tarqatib yuborgan.
Mazkur holat yuzasidan Marhamat tumani IIB huzuridagi Tergov bo‘limi tomonidan M.T.ga nisbatan Jinoyat kodeksining 139-moddasi 3-qismi “g” bandi (tuhmat, ya’ni g‘arazgo‘ylik yoki boshqa past niyatlarda bila turib shaxsni sharmanda qiladigan uydirmalar tarqatish) bilan jinoyat ishi qo‘zg‘atilib, ayb e’lon qilingan. Hozirda ushbu jinoyat ishi tegishli tartibda tuman sudiga yuborilgan.
Gumonlanuvchi yuqoridagi modda bilan aybdor deb topilsa, BHMning uch yuz baravaridan besh yuz baravarigacha miqdorda jarima yoki uch yuz oltmish soatdan to‘rt yuz soatgacha majburiy jamoat ishlari yoxud bir yildan uch yilgacha ozodlikni cheklash bilan jazolanadi.
Bundan avval Bekobodlik ayolning eski Telegram akkauntidagi shaxsiy rasmlarini internetda tarqatib yubormaslik uchun undan 5 mln so‘m so‘ragan 15 yoshli qiz ushlangani, Xorazmda ayolning shaxsiy videotasvirlarni qarindoshlariga ko‘rsatish bilan qo‘rqitib, undan 1,5 ming dollar va telefon talab qilgan yigit qo‘lga olingani hamda Toshkentda qizi va yigit o‘rtasidagi munosabatlarni sir saqlash uchun yigitning otasidan pul talab qilgan ayolga jinoyat ishi qo‘zg‘atilgani haqida xabar berilgandi.
Izoh (0)