Nepal poytaxti Katmandu shahrida havoning ifloslanishi xavfli darajaga yetdi, hukumat to‘rt kunga maktablar faoliyatini to‘xtatdi. Bu haqda Reuters nashriga tayanib “Korrespondent.net” xabar berdi.
Hukumat amaldorlaridan Shankar Paudelning ta’kidlashicha, 27—28-mart kunlari poytaxtda havoning ifloslanishi 2016-yildan buyon eng yuqori darajaga yetgan.
Ta’lim vazirligi vakili Dipak Sharma maktablar faoliyatining to‘xtatilishi sakkiz million o‘quvchiga ta’sir ko‘rsatganini aytdi.
Atrof-muhitni muhofaza qilish boshqarmasi ma’lumotlariga ko‘ra, 28-mart kuni Katmanduning Bxaysepati tumanida o‘pkaga chuqur kirib borishi mumkin bo‘lgan o‘rta darajadagi mayda zarralar miqdori bir kub metrga 214 mikrogrammni tashkil qilgan (me’yoriy daraja — bir kub metrga 40 mikrogramm).
Qurilish ishlaridan chiqqan changlar, transport vositalarining zaharli tutunlari va ko‘mir yoqqanda ajrab chiqqan tutunlar 4 million aholiga ega shaharni chang bilan qopladi.
Sog‘liqni saqlash vazirligi aholiga uyda qolishni va favqulodda holatlar bo‘lmasa, ko‘chaga chiqmaslikni tavsiya qildi.
Katmandudagi Nepal xalqaro aeroportining rasmiy vakillari ko‘rish qobiliyatining pastligi parvozlarda jiddiy qiyinchilik yaratayotganini aytdi.
https://www.instagram.com/p/CNCuB8qAkuq/
Izoh (0)