Armaniston poytaxti Yerevandagi kafelardan birida 18-mart kuni jurnalist Paylak Faxradyanni kaltaklagan mamlakatning yuqori texnologiyalar sanoati vaziri Akob Arshakyan iste’foga chiqdi. Bu haqda vazir Facebook sahifasida ma’lum qildi, deb yozadi “TASS”.
Jurnalist Faxradyan 18-mart kuni Arshakyanni ish vaqtida kafedan topgach, o‘zining vazir tomonidan kaltaklanganini aytgan. Shundan so‘ng u Facebook’da Arshakyanning jurnalistni bir necha bor urgani aks etgan videoni joylashtirdi.
Ma’lumot uchun, Arshakyan 2018-yilning oktabrida Yuqori texnologiyalar sanoati vaziri etib tayinlangan edi. U “Fuqarolik shartnomasi” partiyasining boshqaruv kengashi a’zosi va bosh vazir Nikol Pashinyanning eng yaqin maslakdoshlaridan biri hisoblanadi.
Avvalroq Avstraliya bosh prokurori va mudofaa vaziri zo‘rlashga oid bir qator ayblovlar tufayli iste’foga chiqqani haqida xabar berilgandi. Shuningdek, Slovakiyada “Sputnik V” vaksinasiga oid mojaro tufayli sog‘liqni saqlash vaziri iste’foga chiqdi, bosh vazir esa almashtirildi.
Izoh (0)