Rossiyaning Leningrad viloyati, Otradnoy shahridagi “Pella” kemasozlik zavodida qurilayotgan “Scorpion” trauleri (baliq ovlash kemasi) 30-mart kuni sinovlar paytida ag‘darilib ketdi, deb yozadi Meduza.
Xabarga ko‘ra, Rossiya bayrog‘i rangidagi 61 metrlik kema yon tomoniga qulab, iskala devoriga suyanib qolgan. Favqulodda vaziyatlar vazirligining ma’lum qilishicha, kema ag‘darilgach, uning ustiga suv tosha boshlagan, ammo keyin suvni to‘xtatish uchun traulerda kerakli choralar ko‘rilgan.
Ta’kidlanishicha, kemani asl holatiga qaytarish rejalashtirilmoqda. Neft yoqilg‘isi to‘kilib ketishining oldini olish uchun trauler atrofida to‘siqlar o‘rnatildi.
Leningrad viloyati hukumatining xabar berishicha, hodisa sodir bo‘lgan paytda trauler bortida 80 kishi bo‘lgan, 78 nafar ishchi “zudlik bilan evakuatsiya qilingan”. Shu bilan birga, evakuatsiya qilinishidan oldin ishchilar kemaning turli qismlaridan tutib, bir muncha vaqt traulerda qolgani haqida ham xabarlar mavjud.
Shu o‘rinda Favqulodda vaziyatlar vazirligi olti ishchi kemani o‘zlari tark etganini aytdi, boshqa o‘nlab ishchilarning ahvoliga aniqlik kiritilmadi. Rasmiy ma’lumotlarga ko‘ra, ikki kishi qovurg‘a sinishi bilan kasalxonaga yotqizilgan.
Shuningdek, hodisa oqibatida traulerning bir erkak va bir ayol xodimi halok bo‘lgani haqida xabar qilindi.
“Fontanka”nashrining xabar berishicha, ularning yo‘qligi hodisadan so‘ng barcha ishchilar sanab chiqilgandan keyin sezilgan. Shundan so‘ng g‘avvoslar qidiruvga jalb qilingan. 30-mart kuni kechqurun ular kemaning dumidan ikki xodimning jasadini topdi.
Nashrning aniqlik kiritishicha, marhumlar “Intro-Pella” MChJning 44 yoshli xodimi Dmitriy Belousov va “RekordStroy” kompaniyasi xodimi, kemada bo‘yoqchi bo‘lib ishlagan 37 yoshli Matlubaxon Ibrohimova. Ma’lum qilinishicha, Belousov kabellarga o‘ralib qolib vafot etgan.
“Kema nishablikka o‘girish sinovlari paytida ag‘darilib ketdi”, — dedi “Pella” zavodi bosh direktorining o‘rinbosari Ilya Vaysman. 47news xabariga ko‘ra, sinovlarda har biri 6,5 tonna og‘irlikdagi beton bilan to‘ldirilgan metall kublar ishlatilgan. Bu ikkinchi kungi sinovlar bo‘lgan, ammo birinchi holatda ishchilar kemadan chiqarilgan. Kema ag‘darilganini ko‘rgan guvohlar jurnalistlarga birinchi marta bunday bo‘lmayotganini aytgan. “Pella” buni rad etmoqda.
Tergov qo‘mitasi qurilish yoki shu kabi ishlarda xavfsizlik qoidalarini buzish moddasi bilan jinoiy ish qo‘zg‘adi. Shimoli-g‘arbiy transport prokuraturasi mazkur ish bo‘yicha tergovni o‘z nazoratiga oldi.
Izoh (0)