Italiya karabinerlari tomonidan Rimda o‘tkazilgan maxsus operatsiya davomida Rossiya foydasiga josuslikda gumon qilingan ikki kishi hibsga olindi, deb yozmoqda Meduza.
La Repubblica gazetasining yozishicha, ulardan biri Italiya dengiz flotining katta ofitseri va fregat kapitani, ikkinchisi Rossiyaning Rimdagi elchixonasi harbiy xodimi bo‘lgan.
30-mart kuni kechqurun italiyalik harbiy pul mukofoti evaziga rossiyalik harbiyga ba’zi hujjatlarni topshirayotgan paytida ular hibsga olingan. Corriere Della Sera nashrining xabariga ko‘ra, bular NATO’ga oid ba’zi maxfiy hujjatlar bo‘lgan. Gumondorlarning ismlari oshkor qilinmagan.
“RIA Novosti” xabariga ko‘ra, hodisa munosabati bilan Rossiya elchisi Italiya Tashqi ishlar vazirligiga chaqirilgan.
Rossiya diplomatik departamenti harbiy xodimning hibsga olinganini tasdiqladi. “Hodisa sabablari o‘rganilmoqda. Hozircha bu haqda izoh berish noo‘rin deb hisoblaymiz. Nima bo‘lganda ham, sodir bo‘lgan voqea Rossiya va Italiya o‘rtasidagi o‘zaro munosabatlarga ta’sir qilmaydi deb umid qilamiz”, — deyiladi Rossiya elchixonasi bayonotida.
Hibsga olingan rossiyalik askar mamlakatdan chiqarib yuboriladi, chunki uning diplomatik maqomi uni hibsga olishga imkon bermaydi, deya qo‘shimcha qiladi Corriere Della Sera.
Keyinroq Italiya Tashqi ishlar vazirligi josuslik ishiga aloqadorligi taxmin qilingan Rossiya elchixonasining ikki xodimi mamlakatdan chiqarib yuborilishi haqida e’lon qildi.
“Biz ushbu o‘ta jiddiy ishga aloqador ikki rossiyalik amaldorning zudlik bilan mamlakatdan chiqarib yuborilishi to‘g‘risida ma’lum qilamiz”, — deb yozgan vazir Facebook’dagi sahifasida.
Avvalroq Bolgariyada ikki nafar rossiyalik diplomat josuslikda gumon qilinib, Rossiyaga qaytarib yuborilgan edi. Shuningdek, Shvetsiya fuqarosi Rossiya foydasiga josuslikda ayblanib, hibsga olingan.
Eslatib o‘tamiz, Buyuk Britaniyada bir yil ichida uchinchi bor Xitoy ayg‘oqchisi aniqlangan. Ushbu fuqarolar XXR Davlat xavfsizlik vazirligi razvedkasida xizmat qilgan va Britaniyaga jurnalist vizasi bilan kelgan.
Izoh (0)