Арманистон пойтахти Еревандаги кафелардан бирида 18 март куни журналист Пайлак Фахрадянни калтаклаган мамлакатнинг юқори технологиялар саноати вазири Акоб Аршакян истеъфога чиқди. Бу ҳақда вазир Facebook саҳифасида маълум қилди, деб ёзади «ТАСС».
«Бугун менинг юқори технологиялар саноати вазири лавозимидаги сўнгги иш куним. Арманистон фуқароси сифатида мансабдор шахс томонидан фуқарога нисбатан зўравонлик қилинишини номақбул деб биламан, биз зўравонлик бўлмайдиган жамият сари боришимиз керак. Бундан ташқари, юқори лавозимли амалдор халқаро майдонда Арманистон вакили сифатида мен жамият учун ўрнак бўлишим керак», — деб ёзган вазир Facebook’да.
Журналист Фахрадян 18 март куни Аршакянни иш вақтида кафедан топгач, ўзининг вазир томонидан калтакланганини айтган. Шундан сўнг у Facebook’да Аршакяннинг журналистни бир неча бор ургани акс этган видеони жойлаштирди.
Маълумот учун, Аршакян 2018 йилнинг октябрида Юқори технологиялар саноати вазири этиб тайинланган эди. У «Фуқаролик шартномаси» партиясининг бошқарув кенгаши аъзоси ва бош вазир Никол Пашиняннинг энг яқин маслакдошларидан бири ҳисобланади.
Аввалроқ Австралия бош прокурори ва мудофаа вазири зўрлашга оид бир қатор айбловлар туфайли истеъфога чиққани ҳақида хабар берилганди. Шунингдек, Словакияда «Спутник V» вакцинасига оид можаро туфайли соғлиқни сақлаш вазири истеъфога чиқди, бош вазир эса алмаштирилди.
Изоҳ (0)