Венгриянинг OTP Bank’и Ўзбекистоннинг «Ипотека банк»ини хусусийлаштиришда иштирок этади. Бу ҳақда Президент Шавкат Мирзиёев 30 март куни бўлиб ўтган ўзбек—венгер кенгайтирилган форматдаги музокаралар вақтида маълум қилди.
«Венгриянинг OTP Bank’и Ўзбекистоннинг ‘Ипотека банкъининг давлат улушини хусусийлаштиришда иштирок этишни бошлаганини қизғин қутлаймиз», — деди Шавкат Мирзиёев.
Давлат раҳбари ушбу масала юзасидан томонлар «жиддий келишиб олган»ини таъкидлаган. Унинг сўзларига кўра, 30-куни банклар раҳбарлари билан тор доирадаги учрашувда режалар ва истиқболдаги вазифалар муҳокама қилинган. Президент бироз муддат ўтгач, реал натижалар қайд этила бошлашини айтган.
Венгриянинг OTP Bank’и Ўзбекистон бозорига кириб келиши 2020 йилнинг июлидаёқ маълум бўлган эди. Бу ҳақда Венгрия ташқи ишлар ва савдо вазири Петер Сияртонинг Тошкентга ташрифи чоғида сўз очилганди. 2021 йилнинг февралида OTP Banki Ўзбекистондаги банклардан бирини хусусийлаштириш жараёнида қатнашиши хабар қилинган эди.
2019 йилнинг июнь ойида «Ипотека банк»нинг устав капиталидаги давлат улуши 2022 йилнинг якунига қадар 50 фоиздан камроқ бўлиши кутилаётгани таъкидланганди. Банк Халқаро молия корпорацияси иштирокида хусусийлаштирилиши ва трансформация қилиниши кўзда тутилган.
OTP Group (“Gruppa OTP”, BSE: OTP, LSE: OTPD) — молия, суғурта, инвестиция ва банк бизнеси билан шуғулланувчи банк гуруҳи — активлар ва лизингни бошқаришдан тортиб, пенсияларни молиялаштиришгача бўлган соҳаларда фаолият юритади.
Аввалроқ Ўзбекистон билан Венгрия ўртасида стратегик шериклик тўғрисидаги қўшма декларация ва ўндан ортиқ ҳужжат имзолангани тўғрисида хабар берилганди.
Изоҳ (0)