Toshkent viloyati Toshkent tumanida temiryo‘lning butlovchi qismlarini sug‘urib olib, sotib yuborgan o‘smirlar aniqlandi. Bu haqda IIV Transportda xavfsizlikni ta’minlash bosh boshqarmasi xabar berdi.
Ma’lum qilinishicha, 21-mart kuni 16 yoshli K.Sh. Keles shahrida kompyuter o‘yinxonasida o‘ynash uchun puli tugab qolgani sabab temiryo‘l relslari yoniga borib, shu yerga o‘rnatilgan bir dona “UPM24-4” umumiy narxi qariyb 1,5 million so‘mlik kabel muftalarini bog‘lab turuvchi qurilmani yerdan sug‘urib olgan va uni olib ketmoqchi bo‘lgan.
Lekin qutini ichidagi simlar unga xalaqit qilgani sabab u simlarni kesib tashlash niyatida shu yaqin orada yashovchi tanishi 17 yoshli U.K.dan yordam so‘ragan. Ikki yigit bolta bilan temiryo‘l ustiga chiqib “UPM-4” qutini hamda umumiy narxi 625 ming so‘mlik boshqa bir qutini buzib olgan va ikkilamchi qora metallarni qabul qilib olish punktiga borgan. Punkt qorovuli ushbu qurilmalarni 28 kilogramm chiqqanini va narxi 41 ming so‘m bo‘lishini, pulni esa ertasi kuni berishini aytgan.
Ushbu holat bo‘yicha “Keles” bekatida sohaviy xizmat xodimlari tomonidan olib borilgan tezkor profilaktik tadbir natijasida bolalarning shaxsiga aniqlik kiritilgan.
Hozirda voyaga yetmaganlarning qonuniy vakillariga nisbatan Ma’muriy javobgarlik to‘g‘risidagi kodeksning 47-moddasiga (bolalarni tarbiyalash va ularga ta’lim berish borasidagi majburiyatlarni bajarmaslik) asosan hujjatlar rasmiylashtirilib, qonuniy chora ko‘rish uchun Toshkent viloyati voyaga yetmaganlar ishlari bo‘yicha idoralararo Toshkent tumani komissiyasiga yuborilgan.
“Endi voyaga yetmaganlarning ota-onalari farzandlari tomonidan “Toshkent signallashtirish va aloqa distansiyasi” korxonasiga yetkazilgan salkam 950 ming so‘m zararni to‘lashi va Ma’muriy javobgarlik to‘g‘risidagi kodeksning 47-moddasidagi huquqbuzarlik yuzasidan javob berishi kerak bo‘ladi”, — deyiladi xabarda.
Izoh (0)