Тошкент шаҳрида Cobalt ва Lacetti тўқнашуви натижасида фақат ҳайдовчи ҳалок бўлгани ҳақида хабар берилганди. Тергов департаментининг маълум қилишича, ушбу ЙТҲ сабаб бир эмас, икки шахс вафот этган.
Маълум қилинишича, 27 март куни соат 15:30 ларда Мирзо Улуғбек туманидаги шу номли кўчада 43 ёшли Д.К. йўлнинг сирпанчиқ экани сабаб Cobalt русумли автомашинаси бошқарувини йўқотиб, бетон тўсиққа урилган. Оқибатда машина қарама-қарши йўналишга ўтиб кетган ва 31 ёшли С.Р. бошқариб кетаётган Lacetti билан тўқнашган.
Тўқнашув оқибатида Lacetti ҳайдовчиси ва шу машинада йўловчи сифатида кетаётган 33 ёшли аёл вафот этган. 25 ёшли яна бир йўловчи оғир тан жароҳати олиб, шифохонага ётқизилган.
Ҳолат юзасидан Жиноят кодексининг 266-моддаси 2-қисмида (транспорт бошқариш қоидаларини бузиш) назарда тутилган ҳуқуқбузарлик бўйича жиноят иши қўзғатилган. Ҳозирда тергов ҳаракатлари олиб борилмоқда.
Бундан аввал Навоийда йўлни кесиб ўтаётган маст пиёдани Damas уриб кетгани, Қаршида икки нафар пиёдани уриб юбориб, воқеа жойидан кетиб қолган Сobalt ҳайдовчиси 15 суткага қамалгани ҳамда Самарқандда «ЗИЛ» юк машинаси билан тўқнашган Damas ҳайдовчиси воқеа жойида ҳалок бўлгани ҳақида хабар берилганди.
Изоҳ (0)