Chet elga ketayotgan O‘zbekiston fuqarolaridan kutib oluvchi davlatda belgilangan talab va tartiblariga ko‘ra vaksinatsiya talab etiladi. Bu haqda AOKAda bo‘lib o‘tgan brifingda Koronavirusga qarshi kurashish shtabi a’zosi Sevara Ubaydullayeva ma’lum qildi.
– Chet elga ketayotgan O‘zbekiston fuqarolaridan emlanish talab etiladimi?
– Har bir davlatda belgilangan talab va tartiblariga ko‘ra emlanish kerak, ya’ni siz bormoqchi bo‘lgan davlatning talablarida emlanganlik majburiy deb belgilansa, shunga qarab vaksinatsiya talab etiladi.
– Vaksina olishdan bosh tortganlarga nisbatan jazo choralari ko‘riladimi?
– Bu borada ko‘p ma’lumotlar berib borilmoqda. Ya’ni, emlash jarayoni majburiy emas. Biroq vaksinadan bosh tortishdan avval koronavirus kasalligi bilan kasallangandan keyingi kuzatiladigan asoratlar to‘g‘risida ham o‘ylab ko‘rish kerak, deb hisoblaymiz.
Eslatib o‘tamiz, O‘zbekistonda aholini koronavirusga qarshi emlash tadbirlari 2021-yil 1-apreldan boshlanadi. Emlash tadbirlari aprel oyida viloyatlar markazlari va katta shaharlarda boshlanadi, may oyida tuman markazlari va kichik shaharlarda amalga oshiriladi, iyun oyida esa boshqa aholi qatlami emlanadi.
O‘zbekistonda bugungi kunda 1 million 660 ming doza vaksina bor. Ularning 660 ming dozasi COVAX jamg‘armasi tomonidan olib kelingan AstraZeneca vaksinasi, 1 million dozasi O‘zbekiston–Xitoy hamkorligida ishlab chiqilgan ZF-UZ-VAC 2001 vaksinasi.
Aholini ushbu vaksinalar bilan emlash bir paytning o‘zida amalga oshiriladi. Bunda emlanuvchi birinchi emlanishni qaysi vaksina bilan boshlasa, ikkinchisini ham aynan o‘sha vaksina bilan yakunlaydi. AstraZeneca vaksinasi bilan 2 marotaba, ZF-UZ-VAC 2001 vaksinasi bilan 3 marotaba emlash ko‘zda tutilmoqda. Ya’ni, vaksinatsiya ikki xil vaksinada ikki xil amalga oshiriladi. Shuningdek, O‘zbekistonda xususiy klinikalarga COVID-19’ga qarshi pulli emlash o‘tkazishga ruxsat beriladi.
Nurmat Otabekovning o‘zi istalgan vaksina bilan jon deb emlanishini ma’lum qilgan.
Izoh (0)