Чет элга кетаётган Ўзбекистон фуқароларидан кутиб олувчи давлатда белгиланган талаб ва тартибларига кўра вакцинация талаб этилади. Бу ҳақда АОКАда бўлиб ўтган брифингда Коронавирусга қарши курашиш штаби аъзоси Севара Убайдуллаева маълум қилди.
– Чет элга кетаётган Ўзбекистон фуқароларидан эмланиш талаб этиладими?
– Ҳар бир давлатда белгиланган талаб ва тартибларига кўра эмланиш керак, яъни сиз бормоқчи бўлган давлатнинг талабларида эмланганлик мажбурий деб белгиланса, шунга қараб вакцинация талаб этилади.
– Вакцина олишдан бош тортганларга нисбатан жазо чоралари кўриладими?
– Бу борада кўп маълумотлар бериб борилмоқда. Яъни, эмлаш жараёни мажбурий эмас. Бироқ вакцинадан бош тортишдан аввал коронавирус касаллиги билан касаллангандан кейинги кузатиладиган асоратлар тўғрисида ҳам ўйлаб кўриш керак, деб ҳисоблаймиз.
Эслатиб ўтамиз, Ўзбекистонда аҳолини коронавирусга қарши эмлаш тадбирлари 2021 йил 1 апрелдан бошланади. Эмлаш тадбирлари апрель ойида вилоятлар марказлари ва катта шаҳарларда бошланади, май ойида туман марказлари ва кичик шаҳарларда амалга оширилади, июнь ойида эса бошқа аҳоли қатлами эмланади.
Ўзбекистонда бугунги кунда 1 миллион 660 минг доза вакцина бор. Уларнинг 660 минг дозаси COVAX жамғармаси томонидан олиб келинган AstraZeneca вакцинаси, 1 миллион дозаси Ўзбекистон–Хитой ҳамкорлигида ишлаб чиқилган ZF-UZ-VAC 2001 вакцинаси.
Аҳолини ушбу вакциналар билан эмлаш бир пайтнинг ўзида амалга оширилади. Бунда эмланувчи биринчи эмланишни қайси вакцина билан бошласа, иккинчисини ҳам айнан ўша вакцина билан якунлайди. AstraZeneca вакцинаси билан 2 маротаба, ZF-UZ-VAC 2001 вакцинаси билан 3 маротаба эмлаш кўзда тутилмоқда. Яъни, вакцинация икки хил вакцинада икки хил амалга оширилади. Шунингдек, Ўзбекистонда хусусий клиникаларга COVID-19’га қарши пулли эмлаш ўтказишга рухсат берилади.
Нурмат Отабековнинг ўзи исталган вакцина билан жон деб эмланишини маълум қилган.
Изоҳ (0)