Angliya va Shvetsiyaning AstraZeneca farmatsevtika kompaniyasining vaksinasi yangi nom bilan atala boshladi. Bu haqda Shvetsiya Tibbiy mahsulotlar agentligiga tayanib Tengrinews xabar berdi.
Ko‘plab mamlakatlarda yetkazib berilishi to‘xtatilgan AstraZeneca vaksinasi Vaxzervia nomini oldi. 2021-yilning yanvar oyi oxirida Yevropa Dori-darmon vositalari agentligi (EMA) mazkur preparatni COVID-19 Vaccine AstraZeneca sifatida ro‘yxatdan o‘tkazgan edi. Kompaniyaning arizasiga ko‘ra, nomining o‘zgartirilishi EMA tomonidan 25-mart kuni ma’qullandi.
Agentlikning ta’kidlashicha, nom almashishi preparatning boshqa xususiyatlari o‘zgarishini nazarda tutmaydi. Shu bilan birga, yangi mahsulotning yorlig‘i va qadoqlanishi farq qilishi mumkin.
“Nomning Vaxzervia’ga almashishi boshqa hech qanday o‘zgarishlarni ko‘zda tutmaydi. Lekin Tibbiy mahsulotlar agentligi hududlardagi mas’ullarning nom o‘zgargani haqida bilishini istaydi, chunki mahsulotning yangi yorlig‘i va qadoqlanishi avvalgisidan farq qilishi mumkin”, — deyiladi agentlik ma’lumotida.
Preparat bilan emlangandan so‘ng ketma-ket sodir bo‘lgan o‘lim holatlari sababli AstraZeneca vaksinasining obro‘si tushib ketdi. Birinchi bo‘lib Avstriya davlati vaksinadan foydalanishni to‘xtatdi. Keyinchalik Germaniya, Fransiya, Italiya, Ispaniya, Sloveniya, Portugaliya, Kipr, Niderlandiya, Avstriya, Daniya, Estoniya, Latviya, Litva, Bolgariya, Irlandiya, Lyuksemburg, Norvegiya va Islandiya, shuningdek, Yevropadan tashqaridagi Indoneziya, Kongo va Janubiy Afrika mamlakatlarida mazkur vaksinadan foydalanish to‘xtatilgan.
Yevropa Dori-darmon agentligi (EMA) koronavirusga qarshi AstraZeneca vaksinasi xavfsiz va samarali deb e’lon qilgach, Yevropa davlatlari ushbu preparat bilan emlashni qayta boshladi. Xususan, Germaniya, Fransiya, Italiya, Ispaniya, Bolgariya, Portugaliya va Sloveniya, shuningdek, Kanada va Latviyada ham AstraZeneca bilan emlashni qayta boshlashga ruxsat berildi.
Izoh (0)