Yevropa Ittifoqining barcha 27 ta davlati fuqarolari uchun 15-iyundan salomatlik sertifikati joriy qilinadi. Hujjat koronavirusga qarshi emlanganlik haqidagi ma’lumotni o‘z ichiga oladi, deb ta’kidladi vaksinatsiya uchun mas’ul yevrokomissar Tyerri Breton LCI telekanali efirida. Bu haqda “Korrespondent.net” xabar berdi.
Bretonning ta’kidlashicha, sertifikatni smartfonlarga yuklab olish yoki qog‘oz ko‘rinishida chop etish mumkin.
“Sertifikat majburiy bo‘lmaydi, lekin aviakompaniyalar uni talab qilishi mumkin”, — dedi Breton.
Uning so‘zlariga ko‘ra, QR-kodli hujjatda fuqaroning ism-sharifi, tug‘ilgan sanasi, pasport raqami, shuningdek, vaksinatsiyadan o‘tgan-o‘tmaganligi va qanday preparat bilan emlangani hamda koronavirusni boshidan o‘tkazgan-o‘tkazmaganligi haqidagi ma’lumotlar bo‘ladi.
Bu sertifikat a’zo davlatlar o‘rtasida kelishiladi; sertifikat olishni istagan Yevropa aholisi o‘z mamlakatlarida ariza topshirishi mumkin. Bundan maqsad “harakatlarni tiklash, normal hayotga qaytish” va “o‘zi yoki boshqalarni xavf ostiga qo‘ymasdan harakatlanish imkoniyatiga ega bo‘lish”, deb aytdi Breton.
Avvalroq Microsoft kompaniyasi asoschisi, multimilliarder Bill Geyts AQSh va Buyuk Britaniyaning pandemiya boshida yo‘l qo‘ygan eng katta xatolari haqida gapirdi. Geytsning so‘zlariga ko‘ra, o‘zi kabi bir necha kishi “ozgina xarajat evaziga tayyorgarlik ko‘rish va muammolardan qochish mumkin”, deb ogohlantirganiga qaramay, bemorlarga imkon qadar tezroq tashxis qo‘yish uchun bunday investitsiyalar kiritilmadi.
Shuningdek, Rossiya va Xitoyning COVID-19’ga qarshi vaksinalar yetkazib berish sohasidagi harakatlari tufayli Yevropa yangi turdagi jahon urushiga duch keldi, deb ta’kidladi Fransiya prezidenti Emmanuel Makron.
Izoh (0)