Европа Иттифоқининг барча 27 та давлати фуқаролари учун 15 июндан саломатлик сертификати жорий қилинади. Ҳужжат коронавирусга қарши эмланганлик ҳақидаги маълумотни ўз ичига олади, деб таъкидлади вакцинация учун масъул еврокомиссар Тьерри Бретон LCI телеканали эфирида. Бу ҳақда «Korrespondent.net» хабар берди.
Бретоннинг таъкидлашича, сертификатни смартфонларга юклаб олиш ёки қоғоз кўринишида чоп этиш мумкин.
«Сертификат мажбурий бўлмайди, лекин авиакомпаниялар уни талаб қилиши мумкин», — деди Бретон.
Унинг сўзларига кўра, QR-кодли ҳужжатда фуқаронинг исм-шарифи, туғилган санаси, паспорт рақами, шунингдек, вакцинациядан ўтган-ўтмаганлиги ва қандай препарат билан эмлангани ҳамда коронавирусни бошидан ўтказган-ўтказмаганлиги ҳақидаги маълумотлар бўлади.
Бу сертификат аъзо давлатлар ўртасида келишилади; сертификат олишни истаган Европа аҳолиси ўз мамлакатларида ариза топшириши мумкин. Бундан мақсад «ҳаракатларни тиклаш, нормал ҳаётга қайтиш» ва «ўзи ёки бошқаларни хавф остига қўймасдан ҳаракатланиш имкониятига эга бўлиш», деб айтди Бретон.
Аввалроқ Microsoft компанияси асосчиси, мультимиллиардер Билл Гейтс АҚШ ва Буюк Британиянинг пандемия бошида йўл қўйган энг катта хатолари ҳақида гапирди. Гейтснинг сўзларига кўра, ўзи каби бир неча киши «озгина харажат эвазига тайёргарлик кўриш ва муаммолардан қочиш мумкин», деб огоҳлантирганига қарамай, беморларга имкон қадар тезроқ ташхис қўйиш учун бундай инвестициялар киритилмади.
Шунингдек, Россия ва Хитойнинг COVID-19’га қарши вакциналар етказиб бериш соҳасидаги ҳаракатлари туфайли Европа янги турдаги жаҳон урушига дуч келди, деб таъкидлади Франция президенти Эммануэль Макрон.
Изоҳ (0)