O‘zbekistonda poliomiyelitni nazorat qilish kuchaytirilgani haqida xabar berilgan edi. SSV matbuot xizmatining xabar berishicha, 10-martdan boshlab 11 kun davomida 5 yoshgacha bo‘lgan 150 ming nafardan ortiq surxondaryolik bola kasallikka qarshi emlandi.
Bu haqda vazirlik qoshidagi Sanitariya-epidemiologik osoyishtalik va jamoat salomatligi xizmati bo‘lim mudiri Dilorom Tursunova ma’lum qilgan. Uning aytishicha, emlash tadbirida 300 ming doza inaktivlashtirilgan poliomiyelitga qarshi vaksina qo‘llanildi. 2010-yilda O‘zbekistondagi barcha 5 yoshgacha bo‘lgan bolalar hamda Surxondaryo viloyatidagi 35 yoshgacha bo‘lgan aholi poliomiyelit kasalligiga qarshi emlangan.
Dilorom Tursunovaning qayd etishicha, O‘zbekistonda poliomiyelit kasalligi bilan og‘rigan bemor oxirgi marta 1995-yilda qayd etilgan. Bu yo‘nalishda olib borilgan qat’iy sanitariya holatni yaxshilashga qaratilgan chora-tadbirlar orqali O‘zbekiston 2002-yilda “Poliomiyelitdan holi bo‘lgan hudud” degan sertifikatga ega bo‘ldi.
Qo‘shni Tojikiston hududida esa, 2010-yilda ham o‘tkir yuqumli poliomiyelit kasalligi, polivirusning birinchi tipiga chalingan bemor aniqlangan. O‘sha paytda olib borilgan tezkor ehtiyot choralari sababli bu xastalik O‘zbekistonga kirib kelmadi. Ayni paytda esa JSST Tojikistonda bolalar poliomiyeliti avj olgani sabab favqulodda holat e’lon qildi.
Sanitariya-epidemiologik osoyishtalik va jamoat salomatligi xizmati bo‘lim mudirining bildirishicha, O‘zbekistonda bu kasallik tarqalishining oldini olish uchun doimiy ravishda monitoring olib boriladi. Shuningdek, qo‘shni davlat bilan chegara hududlardan kirib kelayotgan fuqarolarda poliomiyelit kasalligi alomatlari borligini aniqlash chora-tadbirlari to‘liq ko‘rilgan. Ayni paytda JSSTga mutasaddilar tomonidan O‘zbekistondagi barqaror vaziyatni monitoring qilish hamda poliomiyelit kasalligining oldini olishda hamkorlikda amaliy ishlar olib borish bo‘yicha taklif kiritildi.
JSST ma’lumotlariga ko‘ra, poliomiyelit — viruslar keltirib chaqiradigan yuqori infeksiyali kasallik. Kasallik asab tizimini shikastlaydi, bir necha soatlarda umumiy falajlikka olib kelishi mumkin. Poliomiyelit bilan asosan 5 yoshgacha bo‘lgan bolalar kasallanadi. Virus ifloslangan oziq-ovqat mahsulotlari va suv orqali o‘tadi, ichakda ko‘payadi va u yerdan asab tizimiga o‘tishi mumkin. Infeksiyalangan kishilarning aksariyatida kasallik alomatlari bo‘lmaydi, lekin virus ularda axlat orqali chiqib ketadi va shu orqali u boshqa odamlarga yuqishi mumkin.
Infeksiyaga chalinishning har 200 ta holatidan birida umrbod falajlik (asosan oyoqlarda) yuzaga keladi. Isitma, toliqish, bosh og‘rig‘i, qayt qilish, oyoq-qo‘llardagi og‘riqlar, bo‘yin qotib qolishi uning dastlabki alomatlaridir.
Poliomiyelit bedavo, uni faqat emlash orqali oldini olish mumkin. Bir necha marotaba yuborilgan vaksina bolani deyarli butun umri davomida himoya qiladi.
Eslatib o‘tamiz, O‘zbekiston bolalarni poliomiyelitdan himoya qilish maqsadida 2018-yilda 4 oylik bolalarga qilinadigan inaktivlashtirilgan poliomiyelit vaksinasi (IPV) tatbiq etilgandi.
Izoh (0)