Bekobodda pul o‘g‘irlagan qizni haqorat qilib, unga zo‘ravonlik qilgan erkakka nisbatan jinoiy ish qo‘zg‘atildi, deya xabar bermoqda Toshkent viloyati IIBB.
Qayd etilishicha, 28-mart kuni ijtimoiy tarmoqda “Bekobodda 50 ming so‘m pulini o‘g‘irlagani uchun jazolandi” izohi bilan videoxabar tarqaldi.
Ushbu holat Toshkent viloyati IIBB nazoratida Bekobod shahar IIB xodimlari tomonidan o‘rganilib, qonuniy chora ko‘rilishi ta’minlandi.
Tafsilotga ko‘ra, voqea aslida 2021-yil 13-mart kuni Bekobod shahrida sodir bo‘lgan. “Xos” jamoaviy xo‘jaligida yashovchi, 1995-yilda tug‘ilgan B.X. o‘ziga oldindan tanish bo‘lgan 1999-yilda tug‘ilgan F.X.ning xonadoniga mast holda borgan va u yerda fuqaro F.X.ni har xil so‘zlar bilan haqorat qilib, urib, g‘ayritabiiy yo‘l bilan jinsiy ehtiyojini qondirishga harakat qilgan.
Ushbu jarayonda voqea videotasvirga olinib, ijtimoiy tarmoqda tarqatilgan.
Bekobod shahar Tibbiyot birlashmasining 28-mart kunidagi tibbiy ma’lumotnomasiga ko‘ra, fuqaro F.X.ning chap qo‘l yelka sohasida tan jarohatlari borligi aniqlangan.
Mazkur holat yuzasidan B.X.ga nisbatan Bekobod shahar IIB Tergov bo‘limi tomonidan O‘zbekiston Respublikasi Jinoyat kodeksining 119-moddasi 1-qismi (jinsiy ehtiyojni zo‘rlik ishlatib, g‘ayritabiiy usulda qondirish) bilan jinoyat ishi qo‘zg‘atilgan. Hozirda dastlabki tergov harakatlari olib borilmoqda.
Bundan avval Toshkentda 10 yoshli bolaning nomusiga tegishga uringani aytilgan taksi haydovchisi ushlangani, Nurafshonda voyaga yetmagan bolani zo‘rlashda ayblanayotgan fuqaro sud binosidan qochib ketgani hamda Qashqadaryoda 8-sinf o‘quvchisini zo‘rlagan va qizning homiladorligini bilgach, unga o‘zini o‘ldirish usullarini o‘rgatgani aytilgan fuqaro javobgarlikka tortilmasligi ma’lum bo‘lgani haqida xabar berilgandi.
Izoh (0)