Ўзбекистонда полиомиелитни назорат қилиш кучайтирилгани ҳақида хабар берилган эди. ССВ матбуот хизматининг хабар беришича, 10 мартдан бошлаб 11 кун давомида 5 ёшгача бўлган 150 минг нафардан ортиқ сурхондарёлик бола касалликка қарши эмланди.
Бу ҳақда вазирлик қошидаги Санитария-эпидемиологик осойишталик ва жамоат саломатлиги хизмати бўлим мудири Дилором Турсунова маълум қилган. Унинг айтишича, эмлаш тадбирида 300 минг доза инактивлаштирилган полиомиелитга қарши вакцина қўлланилди. 2010 йилда Ўзбекистондаги барча 5 ёшгача бўлган болалар ҳамда Сурхондарё вилоятидаги 35 ёшгача бўлган аҳоли полиомиелит касаллигига қарши эмланган.
Дилором Турсунованинг қайд этишича, Ўзбекистонда полиомиелит касаллиги билан оғриган бемор охирги марта 1995 йилда қайд этилган. Бу йўналишда олиб борилган қатъий санитария ҳолатни яхшилашга қаратилган чора-тадбирлар орқали Ўзбекистон 2002 йилда «Полиомиелитдан ҳоли бўлган ҳудуд» деган сертификатга эга бўлди.
Қўшни Тожикистон ҳудудида эса, 2010 йилда ҳам ўткир юқумли полиомиелит касаллиги, поливируснинг биринчи типига чалинган бемор аниқланган. Ўша пайтда олиб борилган тезкор эҳтиёт чоралари сабабли бу хасталик Ўзбекистонга кириб келмади. Айни пайтда эса ЖССТ Тожикистонда болалар полиомиелити авж олгани сабаб фавқулодда ҳолат эълон қилди.
Санитария-эпидемиологик осойишталик ва жамоат саломатлиги хизмати бўлим мудирининг билдиришича, Ўзбекистонда бу касаллик тарқалишининг олдини олиш учун доимий равишда мониторинг олиб борилади. Шунингдек, қўшни давлат билан чегара ҳудудлардан кириб келаётган фуқароларда полиомиелит касаллиги аломатлари борлигини аниқлаш чора-тадбирлари тўлиқ кўрилган. Айни пайтда ЖССТга мутасаддилар томонидан Ўзбекистондаги барқарор вазиятни мониторинг қилиш ҳамда полиомиелит касаллигининг олдини олишда ҳамкорликда амалий ишлар олиб бориш бўйича таклиф киритилди.
ЖССТ маълумотларига кўра, полиомиелит — вируслар келтириб чақирадиган юқори инфекцияли касаллик. Касаллик асаб тизимини шикастлайди, бир неча соатларда умумий фалажликка олиб келиши мумкин. Полиомиелит билан асосан 5 ёшгача бўлган болалар касалланади. Вирус ифлосланган озиқ-овқат маҳсулотлари ва сув орқали ўтади, ичакда кўпаяди ва у ердан асаб тизимига ўтиши мумкин. Инфекцияланган кишиларнинг аксариятида касаллик аломатлари бўлмайди, лекин вирус уларда ахлат орқали чиқиб кетади ва шу орқали у бошқа одамларга юқиши мумкин.
Инфекцияга чалинишнинг ҳар 200 та ҳолатидан бирида умрбод фалажлик (асосан оёқларда) юзага келади. Иситма, толиқиш, бош оғриғи, қайт қилиш, оёқ-қўллардаги оғриқлар, бўйин қотиб қолиши унинг дастлабки аломатларидир.
Полиомиелит бедаво, уни фақат эмлаш орқали олдини олиш мумкин. Бир неча маротаба юборилган вакцина болани деярли бутун умри давомида ҳимоя қилади.
Эслатиб ўтамиз, Ўзбекистон болаларни полиомиелитдан ҳимоя қилиш мақсадида 2018 йилда 4 ойлик болаларга қилинадиган инактивлаштирилган полиомиелит вакцинаси (ИПВ) татбиқ этилганди.
Изоҳ (0)