Тошкентда Cobalt ва Lacetti иштирокида содир бўлган ЙТҲда 30 ёшли ҳайдовчи вафот этди

Тошкентда Cobalt ва Lacetti автомобиллари тўқнашуви натижасида ҳайдовчилардан бири вафот этди, дея хабар берди Тошкент шаҳар ИИББ.

Маълум қилинишича, 27 март куни соат 15:30 ларда Мирзо Улуғбек тумандаги шу номли кўчада 43 ёшли Д.К. Cobalt русумли автомашинаси бошқарувини йўқотиб, бетон тўсиққа урилган. Оқибатда машина қарама-қарши йўналишга ўтиб кетган ва 30 ёшли С.Р. бошқариб кетаётган Lacetti билан тўқнашган.

Ҳодиса оқибатида Lacetti автомашинасининг йўловчилари — 24 ёшли Ш.Ш., 32 ёшли Н.К. шунингдек, танасида турли даражада тан жароҳатлари олган Cobalt автомашинаси ҳайдовчиси касалхонага ётқизилган.

Lacetti автомашинаси ҳайдовчиси олган жароҳатлари туфайли воқеа жойида вафот этган.

Ушбу факт бўйича Жиноят кодексининг 266-моддаси 2-қисмида (транспорт бошқариш қоидаларини бузиш) назарда тутилган ҳуқуқбузарлик бўйича жиноят иши қўзғатилди. Ҳозирда тергов ҳаракатлари олиб борилмоқда.

Бундан аввал Қашқадарёда тўй куни куёвнинг отаси ва икки қариндоши ҳамда келиннинг холаси ЙТҲга учраб, ҳалок бўлгани, Тошкентда 60 ёшли аёл юк машинаси уриб кетиши оқибатида ҳалок бўлгани ҳамда Андижонда икки Nexia йўлни кесиб ўтаётган велосипедчини уриб кетгани ҳақида хабар берилганди.