Қашқадарё вилоятининг Чироқчи туманида яшовчи фуқаро бильярдхонада қўшниси билан тортишиб қолиб, уни пичоқлаб ўлдирди. Бу ҳақда «Дарё»га вилоят ИИБ ахборот хизмати маълум қилди.
Таъкидланишича, мазкур жиноят 2021 йилнинг 15 март куни кечки пайт соат 20:00 да содир бўлган.
Туманнинг «Пахтаобод» маҳалласида содир этилган қотиллик жинояти вилоят ИИБ бошлиғи Шуҳрат Сотволдиев иштирокида муҳокама қилинган.
«2021 йилнинг 15 март куни соат 20:00 да Пахтаобод қишлоғида жойлашган бильярдхонада бильярд ўйнаётган марҳум И. шу қишлоқда яшовчи Ж. билан навбат талашиб жанжаллашиб қолган. Икковлон бир-бирини ҳақорат қилгач, Ж. уйига кетган. Йўл-йўлакай аччиқ устида рақибининг ҳақоратларини таҳлил қилиб, ошхона пичоғини олган ва яна бильярдхонага қайтиб келган. Кейин И.ни ташқарига чақириб олиб, ‘Сен нима учун менинг онамни сўкдинг?!’, дея қўлидаги пичоқни унинг чап кўкрагига икки марта санчган. Пичоқ зарбидан ерга йиқилган И. шифокорлар кўрсатган тиббий ёрдамга қарамай вафот этган», — дейилади вилоят ИИБ ахборот хизмати хабарида.
Вилоят ИИБ бошлиғи иштирокидаги муҳокамада таъкидланишича, жиноятнинг юзага келишида бильярд ўйинини ташкил қилган фуқаронинг ҳам айби бор.
«Ҳали тадбиркорлик мақомини олмасдан, қурилиши тугалланмаган бинода бильярд ўйинини ташкил этган фуқаро икки маротаба солиқ органлари томонидан огоҳлантирилган. Қолаверса, маҳалла фуқаролар йиғини томонидан ҳам бир неча бор огоҳлантирилганига қарамасдан, фаолиятини давом эттирган», — дея ҳолатга муносабат билдирган муҳокамада сўз олганлар.
Изоҳ (0)