Qozog‘iston poytaxti Nur-Sulton shahrida koronavirus bilan kasallangan bemorlar uchun tibbiyot muassasalarida qo‘shimcha o‘rinlar tashkil etilmoqda, jonlantirish bo‘limlarida joy qolmadi. Bu haqda mamlakat poytaxtining jamoat sog‘lig‘ini saqlash boshqarmasi rahbari Timur Muratovga tayanib, “Interfaks” xabar berdi.
“Travmatologiya va ortopediya ilmiy-tadqiqot instituti bazasida yuqumli kasalliklar shifoxonasini ochishimizga to‘g‘ri keladi. Afsuski, kasallanish darajasi keskin o‘sdi. Mavjud 720 o‘rin kamlik qilmoqda, so‘nggi bir oyda virus hayot uchun xavfli asoratlarni keltirib chiqarmoqda, — deb yozgan Muratov ijtimoiy tarmoqda foydalanuvchilarning savollariga javob berib. — Jonlantirish bo‘limlarida joylar to‘ldi”. Shuningdek, u aholini sanitar-epidemiologik me’yorlarga qat’iy amal qilishga chaqirgan.
Qozog‘iston poytaxti 28-fevraldan buyon COVID-19 tarqalish darajasi bo‘yicha “qizil” hudud (xavf darajasi yuqori) hisoblanadi. O‘tgan bir kun davomida shaharda koronavirusga chalinish bo‘yicha 185 ta yangi holat aniqlandi.
Avvalroq Nur-Sultonda 18-martdan cheklov va karantin choralari kuchaytirilishi haqida xabar berilgan edi. Ommaviy tadbirlar, shu jumladan, oilaviy marosimlar va ma’rakalar, shuningdek, uyda tashkillashtiriladigan ziyofatlar, to‘ylar, yubileylar, ma’rakalarni o‘tkazish va ularda qatnashish, bundan tashqari, bayram korporativlari, mitinglar, namoyishlar, yig‘inlar tashkillashtirish va o‘tkazish taqiqlandi.
Mavzuga doir:
- O‘zbekiston, Qozog‘iston va Qirg‘izistonda koronavirus tufayli Navro‘z nishonlanmaydi. Tojikistonda esa hamma sayilga chiqadi
- Qozog‘istonda koronavirus bilan bog‘liq vaziyat yomonlashmoqda. Karantin kuchaytirilib, vaksinatsiya kengaytirilmoqda. Yozdagi og‘ir vaziyat takrorlanishi xavfi bor
- Qozog‘istonning ayrim hududlarida 1-martdan boshlab karantin cheklovlari yumshatiladi. O‘zbekistonga aviaparvozlar ko‘paytiriladi
Izoh (0)