So‘nggi bir kecha-kunduzda yuz bergan koronavirus bilan bog‘liq eng muhim xabarlar — “Daryo” koronadayjestida.
Dunyo pandemiyaning avj nuqtasidan o‘tib bo‘ldi
COVID-19’ga chalinish bo‘yicha mahalliy avj olishlar yuz berishi mumkin, ammo umuman olganda dunyoda pandemiyaning avj nuqtasidan o‘tib bo‘lindi. Bunday fikrni Rossiya Fundamental va translyatsion tibbiyot federal tadqiqot markazi eksperimental modellashtirish va yuqumli kasalliklar patogenezi bo‘limi boshlig‘i Aleksandr Shestopalov bildirib o‘tdi.Uning so‘zlariga ko‘ra, SARS-CoV-2’ning bundan keyingi mutatsiyalari vaksinatsiyaga nisbatan reaksiya bo‘lib chiqishi ham mumkin, chunki virus shu paytgacha ham barqarorlashmagan.
“Grippga kelsak, bu epidemik mavsumda u haqiqatan ham ketdi, ammo keyingi mavsumda u albatta qaytib keladi”, — deya ta’kidladi u.
Parranda grippining yangi A(H5N8) shtammi haqida gapirar ekan, Shestopalov u ham boshqa shtammlar kabi ko‘chmanchi qushlar tomonidan tarqatilishini aytdi. Ayni paytda bunday holatlar Ukraina janubida hamda Shimoliy Kavkazda va Rossiyada qayd etilgan.
Yevroittifoq koronavirusning uchinchi to‘lqinini boshdan o‘tkazmoqda
Yevrokomissiya rahbari Ursula fon der Lyayyen koronavirusning uchinchi to‘lqiniga duch kelgan Yevroittifoq mamlakatlaridagi epidemik vaziyat yuzasidan xavotir bildirdi.Biz Yevropada COVID-19’ning uchinchi to‘lqini boshidamiz. Yevroittifoqqa a’zo mamlakatlarning ko‘pchiligida kasallanish holatlari yana ko‘paymoqda, bunga asosiy sabab B.1.1.7 varianti (‘britancha’ shtamm) bo‘lib, u hozir Yevropaning deyarli har bitta mamlakatida bor”, — dedi fon der Lyayyen Yevroittifoq davlat va hukumat rahbarlarining onlayn shaklda o‘tkazilgan sammitida.
Uning so‘zlariga ko‘ra, Yevroittifoq ayni paytda koronavirusga qarshi 88 million doza vaksina qabul qilib olgan, 62 million marta vaksina yuborilgan. 18,2 million kishi yoki aholining 4,1 foizi ikkala dozani ham qabul qilgan. Yozda Yevroittifoq aholisining (voyaga yetgan qismining) 70 foizi emlangan bo‘lishi kerak.
Yevrokomissiya Yevropada COVID-19’ning uchinchi to‘lqini boshlangani haqida 19-martda e’lon qilgan edi. Yevroittifoq mamlakatlari aholini emlashni tezlashtirishga da’vat etildi. Germaniya sog‘liqni saqlash vaziri Yens Shpan esa virusning yangi to‘lqinini yengish uchun Yevroittifoqda vaksinalar yetishmasligi haqida ogohlantirdi.
Ayni paytda Yevroittifoqda COVID-19’ga qarshi to‘rtta vaksina ma’qullangan, bular — Amerikaning Pfizer va Germaniyaning BioNTech kompaniyalari, Amerikaning Moderna va Janssen (Johnson & Johnson’ga tegishli), shuningdek, AstraZeneca Britaniya-Shvetsiya kompaniyasi vaksinalaridir.
COVID-19 bilan kasallanib o‘tganlarning qariyb 100 foizida nevrologik asoratlar kuzatilmoqda
COVID-19 koronavirusi bilan og‘rib o‘tganlarning 99 foizida nevrologik asoratlar kuzatilgan, bular bosh og‘rig‘i va his qilishning buzilishidan tortib, depressiyagacha bo‘lgan holatlardir. Bu haqda Rossiya Sog‘liqni saqlash vazirligining tibbiy reabilitatsiya bo‘yicha shtatdan tashqari bosh mutaxassisi Galina Ivanova ma’lum qildi.“Koronavirus infeksiyasining nevrologik alomatlari kundan kunga, oydan oyga yanada ko‘payib, tobora kuchliroq va og‘irroq bo‘lib bormoqda, bular bosh og‘rig‘i, sezuvchanlikning buzilishi, hid va ta’m bilishning buzilishi, parez (falajning yengil shakli), falajliklar, turli darajadagi kognitiv buzilishlar, sarosima va depressiya bo‘lib, ular koronavirus infeksiyasini boshidan o‘tkazgan bemorlarning qariyb 99 foizida qayd etilmoqda”, — dedi u.
Chop etilgan maqolalarga tayangan holda, Ivanova koronavirus asoratlarini to‘rtta guruhga ajratdi. Birinchi guruhga ekspertlar gipoksiya, bronxial klirensning buzilishi, ko‘krak qafasidagi og‘riqlar, yurak og‘riqlari, ritmning buzilishi va miokarditlar rivojlanishida aks etuvchi kardiorespirator buzilishlarini kiritadi. Nevrologik asoratlar ikkinchi guruhga kiradi. Uchinchi guruh esa muskul-skelet buzilishlaridan iborat bo‘lib, ular bo‘g‘imlardagi og‘riqlar, ularning shamollashi, muskul og‘riqlari, egiluvchanlikning kamayishi, sarkopeniyaning rivojlanishi bilan paydo bo‘ladi. Diareya va ishtahaning pasayishi, ko‘ngil aynishi, jigar sohasidagi og‘riq, qondagi qand miqdorining oshishi kabi metabolik buzilishlar esa to‘rtinchi guruhga kiradi.
Uning so‘zlariga ko‘ra, kasallanib o‘tganlar yuqoridagi belgilarning eng kuchli namoyon bo‘lgani bo‘yicha ixtisoslashgan muassasada reabilitatsiyadan o‘tishi kerak.
Shuningdek:
- 26-mart holatiga dunyoda pandemiya boshidan buyon koronavirusga chalinganlar soni 125 431 910 kishini tashkil qilmoqda. Jons Hopkins universiteti ma’lumotlariga qaraganda, COVID-19 bilan bog‘liq o‘limlar 2 755 210 taga yetgan. Kasallanganlar soni 10 million va undan yuqori bo‘lgan mamlakatlarga AQSh, Braziliya va Hindiston kiradi.
- Shimoliy Atlantika alyansi — NATO bosh qarorgohida 25-mart kuni xodimlarni koronavirusga qarshi emlash boshlandi. Avvalroq 20 nafar polshalik mutaxassislar tomonidan amalga oshiriladigan vaksinatsiya chog‘ida qariyb 3,5 mingta dozadagi AstraZeneca dorisidan foydalanilishi ma’lum qilingan edi. Emlanish taklifi NATO bosh qarorgohidagi barcha xodimlarga, shuningdek, 30 ta milliy delegatsiyalarda ishlaydigan odamlar uchun ham amal qiladi.
- AstraZeneca Britaniya-Shvetsiya kompaniyasi bilan birga koronavirusga qarshi vaksina ishlab chiqqan Oksford universiteti burunga sepiladigan dori shaklidagi AZD1222 vaksinasini klinik sinovdan o‘tkazish uchun ishtirokchilarni yig‘ishni boshladi. Sinovlarning birinchi bosqichi 30 nafar voyaga yetgan shaxs ishtirokida kelasi haftadayoq boshlanadi va to‘rt oy davom etadi.
Izoh (0)